ينشاللا 18 ميلليون قازاقستاندىقپىز

21

قازاقتا «كوپ قورقىتادى، تەرەڭ باتىرادى» دەگەن ماقال بار. راسىندا دا  حالقى كوپتىڭ سەسى باسادى، دەسى ارتىق ەكەنى بەشەنەدەن بەلگىلى. شۇكىر، سوڭعى جىلدارى ەلىمىزدەگى حالىق سانى وسىپ كەلەدى. ستاتيستيكالىق مالىمەتتەرگە قاراعاندا، قازاقستان حالقىنىڭ سانى 18 ميلليوننان استى. تاۋبا. قۋانارلىعى، بالا تۋۋ كورسەتكىشى بويىنشا جەرگىلىكتى حالىق تىعىز ورنالاسقان وڭتۇستىك، قىزىلوردا، اتىراۋ، الماتى مەن ماڭعىستاۋ وبلىستارىمەن قاتار استانا مەن الماتى قالاسى كوش ىلگەرى تۇر. ال بۇل قازاقتاردىڭ كوپ بالالى بولۋدى الى دە بولسا قالايتىنىن كورسەتسە كەرەك. تەك بىر وكىنىشتىسى – كەلىنشەكتەر اراسىندا «بالا تاپسام دەنە بىتىمىم بۇزىلادى»، «بەتىمە اجىم تۇسەدى» دەپ جاھاندانۋدىڭ ازعىرۋىنا بوي الدىرعاندار دا بارشىلىق. ودان بولەك ەل ىشىندە تۇرلى جاعدايلارمەن بىر بالاعا زار نەمەسە بىر-ەكى بالامەن عانا شەكتەلگەن وتباسىلار دا جەتىپ ارتىلادى. ەلىمىزدىڭ كەيبىر ايماقتارىندا ەكولوگييالىق جاعدايدىڭ ناشارلاۋىنا بايلانىستى، ەسكەرەتىن ماسەلە دال قازىر وسى بولىپ تۇر. بىزدە تەك «ەل ۇكىمەتى ەسكەرسە، وسىنى ەسكەرسىن!» دەگەن تىلەك قانا.

نەگىزى بالانىڭ جيى دۇنيەگە كەلۋىنە ار وتباسىنىڭ الەۋمەتتىك جاعدايىنا  قاتىسى جوقتاي كورىنەدى كەيدە. سەبەبى، دۇنيە ەسىگىن اشقان ار بالاعا بەرىلەتىن جاردەماقىسى تىم جوعارى جاپونييا، گەرمانييا مەن اراب ەلدەرىنە قاراعاندا، جاعدايى تومەن افريكا ەلدەرى، ورتالىق ازيياداعى وزبەكستان مەن تاجىكستاندا بالا تۋۋ كورسەتكىشى الدە قايدا جوعارى.

ەكى بالا اكەسى مەن شەشەسىنىڭ ورنىن عانا باساتىنىن ەسكەرسەك، ۇلت سانىنىڭ ارتۋىنا ۇشىنشى (شىعىننىڭ ورنىن تولتىرۋشى) بالا دا ەمەس، تەك تورتىنشى بالادان كەيىنگىلەر عانا ۇلەس قوسا الادى.

حالىق سانى كوپ بولعان سايىن ەل ىشىندە كاسىپورىندار مەن وندىرىس كوبەيىپ، ساۋدا-ساتتىق قىزا تۇسەتىنى بەلگىلى. سول ارقىلى بارلىق سالانىڭ قىزمەتى جاندانىپ، تاۋار ساپاسىنىڭ ارتۋىنا ىقپالى زور. ال بۇل ۇلتتىڭ باسەكەگە قابىلەتتىلىگىن ارتتىرماسا كەمىتپەيتىنى بەلگىلى.

فوتو: سارسەنبەك قىزايبەكۇلى

    

پىكىر جازۋ