بالىقتاردىڭ ىڭكارلىگى

GettyImages-GA10842-10

جۇبىڭىزدى وزىڭىزگە ەرەكشە جاقىن ۇستاۋ­دىڭ ارتىقشىلىقتارى بار.

تاس قاراڭعى مۇحيتتىڭ بىر نەمەسە بىرنەشە شاقىرىم تەرەڭدىگىندە سۋ تۇبىن مەكەندەيتىن قارماقشى بالىق سەرىك­تەستەرىن ىزدەيدى. Ceratioid تۇقىمدا­سىنىڭ 162 تۇرى ەرەكشە جۇپ قۇرايدى: انالىقتارى اتالىقتاردان الدە قايدا ۇلكەن (ايىرماشىلىق بىر مەترگە دەيىن جەتەدى.). ەڭ قىزىعى، ولار بىر-بىرىن ايى­رىقشا جولمەن تابادى.

اتالىعى دەلديگەن تاناۋىمەن انا­لىقتىڭ سۋ ارقىلى تارالاتىن فەرومون­دارىن قارماپ الادى. ول انالىقتىڭ باسىنداعى قارماۋىشى ارقىلى تارالا­تىن بيوليۋمينەستسەنتتى ساۋلەنى ىزدەيدى. ۋاشينگتون ۋنيۆەرسيتەتىنىڭ يحتيولوگى تەد پيتچتىڭ ايتۋىنشا، مۇنداي ساۋلەنىڭ پىشىنى، ورنەك پيگمەنتتەرى جانە جارىق تولقىندا­رى اتالىققا شاعىلىسۋعا لايىق انالىق تابۋعا كومەكتەسەدى.

اتالىعى قاراڭعى تۇڭعيىقتا سەرىكتەسى­نەن كوز جازىپ قالماس ۇشىن انالىعىن دەنەسىنەن قاپسىرا تىستەپ، سول كۇيدە قاتىپ قالادى. «اقىر سوڭىندا اتالىعى مەن انالىعىنىڭ تەرىسى بىتىسىپ كەتەدى»، – دەيدى پيتچ. ەكەۋىنىڭ تىپتى قان تامىرلارى بىرىگىپ كەتەدى. انالىعى شاعىلىسۋعا دايىن بولعانعا دەيىن اتالىقتىڭ دەنە مۇشەلەرى قىزمەتىن توقتاتىپ، تولىق ىستەن شىعادى.

دايىن بولعاندا انالىعى اتالىققا بەلگى بەرەدى. سويتىپ، اتالىق سۋعا شاۋەت شىعارا­دى. ال انالىعى سۋعا شاۋەتتى سىڭىرىپ الاتىن گەل تارىزدى قويمالجىڭ جىبەرەدى.

ۇرىقتاندىرىلعان جەپ-جەڭىل جۇمىرتقالار وسىلايشا سۋ بەتىنە قالقىپ شىعادى. ولار سول جەردە تۋىلىپ، پلانكتونمەن قورەكتەنەدى. پيتچتىڭ ايتۋىنشا، قارماقشى بالىقتار دامىپ، جەتىلە باستاعان ساتتە «ۆەرتيكالدى ميگراتسييا» جاسايدى، ياعني، وز سىڭارلارىن تابۋ ۇشىن قاراڭعى سۋ تۇبىنە قايتا ورالادى.

تسەراتويد قارماقشى بالىق.

مەكەن ەتەتىن ايماعى: كوز كەلگەن مۇحيتىڭ تۇپكى بولىگى.

قورعالۋ جاعدايى: قاۋىپ-قاتەر دەڭگەيىن انىقتاۋ ۇشىن قاجەتتى دەرەك جوق.

وزگە دەرەكتەر: كەيبىر انالىقتارى Haplophryne mollis سيياقتى بىرنەشە اتالىقپەن شاعىلىسادى. بىزگە بەلگىلى رەكوردتىق كور­سەتكىش – سەگىز.

پاتريسييا ەدموندس

فوتو: پيتەر دەۆيد، GETTY IMAGES

    

پىكىر جازۋ