بىرجاندى دا، قىز جىبەكتى دە الەمگە تانىتقان – استانا وپەرا

01

استاناداعى اسپانمەن تالاسقان عيماراتتار ىشىندە «استانا وپەرا» وپەرا جانە بالەت تەاترىنىڭ ورنى بولەك. ەسىلدىڭ سول جاق جاعالاۋىندا ورنالاسقان بۇل ونەر ورداسىنىڭ سىرتقى كورىنىسى كەز كەلگەن ادامدى وزىنە قاراتىپ قانا قويماي، تامساندىرىپ، تاڭداي قاقتىرارى انىق. اسا تالعامپاز شەبەرلەردىڭ قولىنان شىققان تەاتردىڭ ىشكى قۇرىلىمى دا تولىقتاي زاماناۋي قۇرالدارمەن جابدىقتالعان. ال تەاتردىڭ تالانتتى ترۋپپاسى ورىندايتىن رەپەرتۋارى سان الۋان.

02

2013 جىلى پايدالانۋعا بەرىلگەن ول تەاتر وزىنىڭ العاشقى تەاتر ماۋسىمىن م. تولەباەۆ وسىدان 70 جىلدان استام ۋاقىت بۇرىن جازعان «بىرجان-سارا» وپەراسىمەن اشقان بولاتىن.

03

«استانا وپەرا» تەاترى ميلانداعى «لا سكالا»، نيۋ يوركتەگى مەتروپوليتەن-وپەرا جانە ماسكەۋدەگى ۇلكەن تەاتر سەكىلدى بەلگىلى تەاترلار قاتارىنان ورىن الادى.

04

جالپى اۋماعى 9 گەكتار جەردى الىپ جاتقان عيمارات الاڭقايى 64 مىڭ شارشى مەترگە تەڭ. ونىڭ 3 مىڭ شارشى مەترىن ساحنالىق الاڭدار الىپ جاتسا، ال ونىڭ بيىكتىگى 13 مەتردەن اسادى. الەمنىڭ ەڭ وزىق كلاسسيكالىق ۇلگىلەرى نەگىزگە الا وتىرىپ سالىنعان تەاتر عيماراتىنىڭ ىشى-سىرتىنان ۇلتتىق ناقىشتاعى ويۋ-ورنەكتەردى دە بايقاۋعا بولادى. اتاپ ايتقاندا، تەاتردىڭ كىرەبەرىسىندە «قوبىزشى» جانە «جەتىگەنشى قىز» تۋىندىسى سان بەرىپ تۇرسا، سىرتقى ماڭدايشاسىنا قولا كۆادريگا – تورت جۇپ ات جەگىلگەن قوس دوڭعالاتى اربادا ساق پاتشايىمى تۇماردىڭ (توميريس) مۇسىنى قويىلعان.

05

06

«استانا وپەرا» تەاترى ۇلكەندىگى جاعىنان الەمدە ۇشىنشى ورىندا تۇر. ونى يتالييا، گەرمانييا، شۆەيتسارييا مەن چەحييادان كەلگەن شەبەرلەر سالعان. تەاتر ساحناسى جۇيەسىنىڭ كۇردەلىگى سونشالىق وندا كەز كەلگەن ۋاقىتتا، كەز كەلگەن سپەكتاكلدى قويا بەرۋگە بولادى. جانە ونداعى ۆەستيبيۋل، فويە، كورەرمەن زالى مەن ساحنا جوعارعى كلاسسيتسيزم ستيلىندە ورىندالعان. 1250 ورىنعا شاقتالعان زالدىڭ اكۋستيكاسىمەن يتاليياندىق ماماندار اينالىسسا، پاركەت ەدەن، پانەل تاقتالارى مەن كورەرمەندەر وتىراتىن ورىندىقتار يتالييادان الدىرتىلعان.

07

08

09

فوتو: ەرلان وماروۆ

    

پىكىر جازۋ