قۇستىڭ دا جاي قۇسى ەمەس، تاۋىس قۇسى

IMG_6865

تاۋىس قۇسى (پاۆلين) – جەر بەتىندەگى ەڭ ادەمى قۇستاردىڭ كوشىن باستاپ تۇر. ول تۋرالى تالاي رەت ايتىلىپ تا، جازىلىپ تا جۇر. ال وسى قۇستىڭ نەگە ەرەكشە ادەمى بولىپ كورىنەتىنىن زەرتتەپ كورگەن قىتايدىڭ FUDAN ۋنيۆەرسيتەتىنىڭ عالىمدارى «بار گاپ قۇستىڭ بويىنداعى پيگمەنتتەر مەن بوياۋلاردىڭ قۇرىلىمىندا» دەپ جازعان.

ولاردىڭ جازۋىنشا، تاۋىستىڭ دەنەسىندە تەك وزىنە عانا تان بوياۋ شىعاراتىن قوسىمشا اعزاسى بار. ونىڭ قاۋىرسىندارى كوك، اشىق كوك، جاسىل، كۇلگىن، التىن تۇستى سارى، قوڭىر جانە قىزعىلت بولىپ سان تۇسكە بويالاتىندىعى سوندىقتان. «ال قاۋىرسىن بويىنداعى جان-جاققا تارماقتالاتىن «بۇتاقشالاردىڭ» ارقايسىسى كريستال قۇرىلىمدارىنان، مەلانين مەن كەراتين اقۋىزىنان قۇرالعان»، – دەيدى ولار.

ول قۇستى باسقا قۇستاردان ەرەكشەلەپ، تارتىمدى ەتەتىنى ونىڭ الىپ جەلدەتكىش سەكىلدى قاناتتارى م ەن جامباس تۇسىندا ورنالاسقان قاۋىرسىنى بولسا كەرەك. كەيبىر تاۋىستىڭ  قاۋىرسىنى 2 مەترگە دەيىن جەتسە، دەنە تۇرقى 100-125 سانتيمەتردەن بيىك بولادى.

قىرعاۋىل تۇقىمداسىنا جاتاتىن تاۋىس قۇسى جاۋىن جاۋار الدىندا نەمەسە قاتەردىڭ تونگەنىن سەزگەن بويدا مىسىقتىڭ داۋىسىنا سالىپ، ساقتىق شارالارىن جاسايدى.

تاۋىس قۇسى العاش رەت ۇندىستاندا قولعا ۇيرەتىلگەن ەكەن. قازىر وسى ەلدىڭ نىشانى، ارى سيمۆولى ىسپەتتى.

فوتو: بىلال ارسلان

    

پىكىر جازۋ