.

اۆتوكەرۋەن «اسپانتاۋلار ايماعىن» ارالادى

01

قىزىلاۋىز اسۋى.

كۇنگەي الاتاۋىنىڭ اسپانمەنەن استاسقان كورىنىستەرى كوزدىڭ جاۋىن الادى. ونىڭ ەرەكشەلىگى سول، تاۋ جوتالارى جۇرە كەلە قىراتتارعا ۇلاسىپ، بىرتە-بىرتە بيىكتەپ كەلەدى دە، كوككە بارىپ قادالادى. ال تاۋ باۋرايىندا جايقالعان قىلقان جاپىراقتى قاراعاي، شىرشا سەكىلدى اعاشتار تۇمسا تابيعاتتىڭ سۇلۋلىعىن ون بويىنا ساقتاپ قالعانداي اسەر قالدىرادى.

02

تاجىريبەلى «كەرۋەن-باسى» ەرجان سىرىمۇلى جەر جاعدايىن بارلاپ تۇر.

03

كۇزدىڭ العاشقى اپتاسىندا «Pokatushki Club-kz» كۇزگى ماۋسىمىنىڭ اشىلۋىنا وراي جول تالعامايتىن 22 كولىكتەن قۇرالعان «دجيپ-تۋر – الاتاۋ» جوباسىمەن بىرگە «National Geographic قازاقستان» جۋرناليستەرى وسىناۋ كورىكتى ايماقتاردى ارالاپ قايتتى.

04

قىلىشباي اسۋى.

05

جىڭىشكە اسۋى.

«بىر كۇندىك ساپارعا بىر اپتالىق قام جاسا» دەمەكشى، الماتىدا تاڭسارىدە جينالعان دجيپەرلەر كۇنگەي الاتاۋىنا بارىپ قايتۋدى بىرنەشە اپتا بۇرىن جوسپارلاعان. كىلەڭ ەكستريمالدى سپورت تۇرىن سۇيەتىن جانداردان قۇرالعان توپ مۇشەلەرى مۇنداي ساپاردىڭ وڭايعا تۇسپەسىن بىلەدى. جولدارى كەدىر-بۇدىر، بىر جاعى تىك جارتاس، ەكىنشى جاعى قۇز جولدارمەن بىر تۇسىپ، بىر كوتەرىلۋ وزى وڭاي شارۋا ەمەس. ال ونداي جولدارمەن بىر ەمەس 22 كولىك قاتار جۇرسە، قاۋىپ قانشا ەسەگە ارتاتىن ەلەستەتە بەرىڭىز. كۇنگەي الاتاۋىنا ساپار – الماتىدان باستاۋ الىپ، رايىمبەك اۋدانىنداعى مويناق گەس-ى، كەڭسۋ، جايداقبۇلاق، ورتا مەركى، شەت مەركى، توعىزبۇلاق، جالاڭاش اۋىلدارى، قىلىشباي اسۋى، جىڭىشكە شاتقالى، قاسقىراۋىز-قىزىلاۋىز، تالعورا، جارعورا مەن اقباقان اسۋلارى، اسى جايلاۋى، تۇرگەن شاتقالى جانە ەسىك باعىتى بويىنشا ورىندالدى.

06

جىڭىشكە اسۋى.

07

«مويناق» گەس-ى

ەكسپەديتسييا مۇشەلەرىن تۇرلى قيىندىقتار كۇتىپ تۇردى. جولدا بىرنەشە كولىك كەيبىر اسۋلاردان كوتەرىلە الماي تۇرىپ قالىپ جاتسا دا ەكسپەديتسييا مۇشەلەرىنىڭ اۋىزبىرشىلىگى ارقاسىندا قيىندىقتار رەت-رەتىمەن شەشىلىپ جاتتى. جولداعى كەدەرگى مۇنىمەن شەكتەلىپ قالعان جوق. تاۋداعى اۋا رايى مىڭ قۇبىلدى. تاڭسارىدەن جادىراپ تۇرعان كۇن، قىلىشباي اسۋىنا جەتكەنىمىزدە الاي-دۇلەي داۋىل تۇرىپ، ارتى شاتىر-شۇتىر نايزاعايعا ۇلاستى. ال دالاشىق جايلاۋى بىزدى تىپتى ازىناعان سالقىن جەلمەن «قارسى الدى». سوعان قاراماستان ەكسپەديتسييا مۇشەلەرى وزدەرىنە قاجەتتى فوتوسۋرەتتەرىن تۇسىرىپ الۋ ۇشىن بىر ساتكە دە دامىل تاپقان جوق. جىڭىشكە اسۋىندا تاماقتانىپ العان دجيپەرلەر سال كىدىرىستەن كەيىن قاسقىراۋىز اسۋىنا قاراي كوتەرىلىپ كەتتى. بۇل كەزدە قارا تۇنەك بۇلتتان جاڭبىر تامشىلارى ۇشقىنداپ، اسۋلاردان وتۋ شىنداپ قيىندىق تۋدىردى. دەگەنمەن ويعا العان ماقسات ورىندالىپ، اۆتوكەرۋەن الماتىعا امان-ەسەن جەتتى.

08

قىلىشباي اسۋى.

09

توعىزبۇلاق اۋىلى.

10

سۋرەتتەردى تۇسىرگەن: دوسجان بالابەكۇلى

       

پىكىر جازۋ