.

جۇزگىش وتباسى

20 مەترلىك WHY شحۋناسى گرەنلاندييا ماڭىندا مۇز جارىپ بارادى. وسى جازدان باستاپ فرانتسييالىق ەكيپاج كەمەمەن گرەنلاندييادان انتاركتيكاعا دەيىن ساپار شەگەدى.
Rolex Note «پوليۋس استىندا» جوباسىن «National Geographic» قوعامىنىڭ عىلىم مەن ونى زەرتتەۋدەگى ارىپتەسى Rolex قولداپ وتىر.

دانيەل ستوۋن

وقيعا بىلاي باستالعان ەدى. 2010 جىلى سۇڭگۋىرلەر گيسلەين باردۋ مەن ەممانۋەل پەري باردۋ سۋ استىنداعى ەكوجۇيەنى زەرتتەۋ ۇشىن سىبىر حاسكيى – كاياكتى وزدەرىمەن بىرگە سولتۇستىك پوليۋسكە ەرتە كەتتى. اتالعان جۇپ زەرتتەۋ­شىلەردىڭ دەنساۋلىعىن باقىلاۋمەن،  سۋرەتكە ارى ۆيدەوعا تۇسىرۋمەن اينالىساتىن سەگىز ادامدىق توپ جاساقتادى. كاياكتىڭ مىندەتى اق ايۋدى كورگەندە ۇرۋ بولاتىن.

باستاپقىدا «پوليۋس استىندا» دەپ اتالعان ولاردىڭ ەكسپەديتسيياسى سودان بەرى جەر شارى مۇحيتتارىنىڭ «قوناقجايلىلىعى ناشار» جەرلەرىن زەرتتەۋگە ارنالعان الەمدىك بارلاۋعا اينالدى. 2014 جىلى گرەنلاندييانىڭ باتىس جاعالاۋىنا ەكسپەديتسيياعا شىعۋ ۇشىن توپ قۇرامى 55 ادامعا دەيىن وسىپ، ولار سول جاقتا رەكوردتىق كورسەتكىش – 111 مەتر­گە دەيىن سۇڭگىدى. «ادامدار بۇل مۇمكىن ەمەس دەپ ەدى، الايدا بىز وعان سەندىك»، – دەيدى پەري-باردۋ. ولاردىڭ ساپارى تۇرلى فيلمدەرگە، كىتاپتارعا جانە كوپتەگەن اكادەمييالىق زەرتتەۋگە ارقاۋ بولدى.

وسى جازدا ولار جانە جۇزگە جۋىق توپ جوبانىڭ ۇشىنشى بولىگىن باستايدى: جەردىڭ ار تۇكپىرىندەگى ەندىكتەرگە ۇش جىلدىق ساپار. ولار فرانتسييادان گرەنلانديياعا وتىپ، اركتيكا ارقىلى الياسكانى اينالىپ، فرانتسييا، وڭتۇستىك امەريكا مۇيىسى سوسىن اتلانت مۇحيتىمەن ەۋروپاعا قايتا ورالىپ، ­80 000 شاقىرىمنان استام قاشىقتىققا ساياحات جاسايدى. جول بويى ولار سۋ بەتىنەن 30 مەتر تومەندەگى ىمىرتتىق ايماق اتالاتىن قاراڭعى تەرەڭدىكتەر الەمىن زەرتتەيدى. سونداي-اق ولار سۇڭگۋ پسيحولوگيياسىنىڭ شەكتەۋلەرىن تەكسەرىپ (مۇز استىنا سۇڭگۋ رەكوردتارىن جاڭارتىپ)، 72 ساعات بويى ۇزدىكسىز سۇڭگۋگە تالپىنىپ كورمەك.

باردۋ مەن پەري-باردۋ وزدەرىنىڭ جەدەل توبىن كەڭەيتتى. قازىر ولار بالالارى – بەس جاسار روبين مەن بىردەگى تومعا ماڭىزدى جۇمىستى سەنىپ تاپسىرا الادى. «ولار بورتتاعى جاعدايدى وزگەرتەدى»، – دەيدى باردۋ.

لۋكاس سانتۋچچي، پوليۋس استىندا/زەپپەلين جەلىسى

       

پىكىر جازۋ