.

ارامشوپ پە، ادال شوپ پە؟

كەپتىرىلگەن القىزىل بۇرىش گەربارييى – ەموري ۋنيۆەرسيتەتىندەگى وسىمدىك ۇلگىلەرى كولەكتسيياسىنىڭ قۇندى جادىگەرى.

ا.ر. ۋيليامس

القىزىل بۇرىش – اقش-تىڭ وڭتۇستىگىندەگى «باسقىنشى» وسىمدىك. ول زەرتتەۋشىلەردىڭ انتيبيوتيكتەرگە توزىمدى باكتەرييالىق ينفەكتسييالارمەن كۇرەسۋىنە وراسان زور كومەكشى بولىپ وتىر. عالىمدار ونىڭ وڭتۇستىك امەريكانىڭ داستۇرلى مەديتسيناسىندا قولدانىلعانىن تاريحي دەرەكتەردەن بىلدى. جارالاردى جازۋعا قولدانىلعان وسىمدىككە تاجىريبە جاساي وتىرىپ عالىمدار ستافيلوكوكك باكتەريياسىنىڭ ۋلى تۇرىن بەيتاراپتاندىراتىن سىعىندى جاساپ شىعاردى.

زاماناۋي انتيبيوتيكتەر باكتەرييانى ولتىرىپ تاستايدى. الايدا كەي باكتەرييالىق جاسۋشالار تىرى قالىپ، تويتارىس كورسەتۋ قاسيەتىن وزدەرىنىڭ «ۇرپاعىنا» بەرىپ، ناۋقاستاردىڭ ومىرىنە قاۋىپ توندىرەتىن جابىسقاق ىندەتتەرگە قارسى دارىگەرلەردىڭ كۇرەسۋىن قيىنداتىپ جىبەردى. القىزىل بۇرىش ينفەكتسييالارعا قارسى ەرەكشە ادىس قولدانادى. ول باكتەرييا­لىق جاسۋشالاردىڭ بايلانىسىنا توسقاۋىل قويىپ، تىن بۇلدىرەتىن ۋىتتىڭ الدىن الادى. بۇل وز كەزەگىندە اعزانىڭ يممۋندىق جۇيەسىنىڭ باكتەريياعا قارسى قورعانىسىن كۇشەيتەدى. «زييانكەستەردىڭ سوڭىنا تۇسۋدىڭ تاسىلىن وزگەرتتىك، – دەيدى ەموري ۋنيۆەرسيتەتىنىڭ ەتنوبوتانيگى كاسساندرا كۋاۆە، – بۇل – ىندەتپەن كۇرەس جولىنداعى جاڭاشا ويلاۋ ادىسى».

كۋاۆەنىڭ ماقساتى – مۇنداي جاڭالىقتى جالپى مەديتسينادا قولدانۋ. قازىر ول سىعىندىنى سوزىلمالى جارالارمەن، ستافيلوكوكك باكتەريياسى اسەرىنەن تۋىندايتىن قىشىماعا جانە باسقا دا تەرى اۋرۋلارىمەن كۇرەسۋ ۇشىن سىقپا تۇرىندە قولدانۋدى جوسپارلاپ وتىر. سونداي-اق ول وزىنىڭ كومەكشىلەرىمەن بىرگە حالىق ەمشىلەرى رەۆماتيزم زاردابى، قالتىراۋ، كۇيۋ، تىرناق ينفەكتسيياسى، ىش وتۋ سەكىلدى كوپتەگەن اۋرۋعا قولدانعان القىزىل بۇرىشتىڭ باسقا قاسيەتتەرىن دە زەرتتەۋ ۇستىندە.

       

پىكىر جازۋ