.

دەنساۋلىق دەگەن نە؟

2014-2017 جج. اقش-تىڭ باس حيرۋرگى بولعان 40-تاعى ۆيۆەك مۋرتي: «قوعام تىنىشتىعى سەنىمدى ترانسپورت، قاۋىپسىز كورشىلەر مەن قولجەتىمدى باسپاناعا تىكەلەي بايلانىستى»، – دەيدى. ول پسيحيكالىق اۋرۋعا قاتىستى ديسكريميناتسييالاۋدى ازايتىپ، ەموتسيونالدى تەپە-تەڭدىك پەن سالاۋاتتى ومىر سالتىن جارنامالاۋدىڭ كەرەك ەكەنىن باسا ايتىپ جۇر.

ادامنىڭ ەموتسيونالدى كوڭىل كۇيى پايدالى ديەتا، سالاۋاتتى ومىر سالتى سەكىلدى ماڭىزدىلىققا يە. نەگە؟

باس حيرۋرگ رەتىندە قىزمەتىمدى باستاعان كەزدە مەن ەموتسيونالدىق جاي-كۇي ماسەلەسىنە نازار اۋدارعام جوق. الايدا ەل ىشىن ارالاپ، كىشى قالالار مەن ۇلكەن شاھارلارداعى ادامداردى تىڭداعاننان كەيىن ونىڭ ماڭىزدى ەكەنىنە كوزىم جەتتى. مەنىڭ تۇسىنگەنىم، ادامدار تەرەڭ ەموتسييالىق كۇيزەلىستەن زارداپ شەگۋدە. مەنىڭشە، ەموتسيونالدى ساۋلىق – ناتيجەلى جۇمىس ىستەۋگە مۇمكىندىك بەرەتىن ىشكى رەسۋرس. ول پسيحيكالىق دەرتتىڭ جوق ەكەنىن عانا بىلدىرمەيدى. بۇل – اۋىرتپالىققا تاپ كەلگەندە وز-وزىڭدى سابىرلى ۇستاۋعا مۇمكىندىك بەرەتىن كۇش.

ونى قالاي رەتتەي الامىز؟

ەڭ اۋەلى ەموتسييا تۋرالى تۇسىنىكتى وزگەرتۋىمىز قاجەت. ەموتسييا – كۇشتىڭ قاينارى جانە ونى عىلىم دا راستايدى. الايدا ماعان كەزدەسكەن ادامداردىڭ كوبى ەموتسييانى السىزدىكتىڭ بەلگىسى رەتىندە ساناۋعا بەيىم. ەكىنشى ماسەلە – بىز ەموتسيونالدى تەپە-تەڭدىكتى قالىپتاس­تىرۋىمىز كەرەك. وعان قاجەتتى نارسەلەر وتە قاراپايىم عانا: ۇيىقتاۋ، فيزيكالىق بەلسەندىلىك، جاقسى كوڭىل كۇي جانە شاما كەلسە، مەديتاتسييا.

باق بەتتەرىندە كۇيزەلىسكە تۇسكەن ادامدار تۋرالى اقپارات كوپ. دارىگەر رەتىندە بۇعان نە ايتاسىز؟

قاتتى ۋايىمدايمىن. مەنىڭشە، بۇل – بىزدىڭ پوتەنتسيالىمىزدى تولىق پايدالانۋعا تۇساۋ بولىپ وتىرعان فاكتور. مەن ۇزاق ۋاقىت بۇعان اسەر ەتەتىن نەگىزگى ەكى كۇش – نە ماحاببات، نە قورقىنىش دەپ ويلادىم. ماحاب­باتتىڭ كوپتەگەن بەلگىسى بار: مە­يىرىم، ريزاشىلىق، قايىرىمدىلىق پەن قۋانىش. قورقىنىش سەزىمى، اشۋ، قىزعانىش جانە قوبالجۋمەن جيى بايلانىستىرىلادى. جۇرتتىڭ كوبىنىڭ بويىن قازىر قورقىنىش بيلەگەن بە دەپ ۋايىمدايمىن. شىن مانىندە، جاعىمسىز جاڭالىقتار عالامدىق ويلاۋدى بىر ساتكە بولسا دا توقىراتادى. بىر جاعىنان، بۇل بىزدىڭ ماحاببات سەزىمىن دۇرىس تۇسىنە الماۋىمىزعا دا بايلانىستى سەكىلدى.

ەڭ اۋەلى سەزىم تۋرالى تۇسىنىگىمىزدى وزگەرتۋىمىز قاجەت. ۆيۆەك مۋرتي، اقش-تىڭ بۇرىنعى باس حيرۋرگى.

فوتو: مارتين شەلەر

سۇحبات ىقشامداپ الىندا.

       

پىكىر جازۋ