.

قازاق فوتوەنتسيكلوپەديياسى جارىققا شىقتى

«National Geographic Qazaqstan» جۋرنالىنىڭ رەداكتسيياسىندا «فوتوونەر» قوعامدىق بىرلەستىگىنىڭ باستاماسىمەن جارىق كورگەن «قازاق فوتوشەجىرەشىلەرى: تاريح، دەرەك، ونەر» فوتوەنتسيكلوپەديياسىنىڭ تۇساۋكەسەر راسىمى وتتى. جيناقتا قوعام ساناسىن فوتو ارقىلى ەستەتيكالىق تالاپتارعا، مەملەكەتتىك مۇددەگە، ۇلتتىق مۇراتقا جۇمىلدىرا بىلگەن قايراتكەرلەردىڭ شىعارماشىلىعى جان-جاقتى باياندالعان. وندا ۇلت كوسەمى احمەت بايتۇرسىنوۆ تۇسىرگەن فوتوسۋرەتتەردەن باستاپ، ەسىمى ەلگە تانىمال اۆتورلاردىڭ سوڭعى جارتى عاسىردا تاسپالاعان اتاقتى تۋىندىلارى دا ەنىپ وتىر.

«بۇگىنگىدەي تاۋەلسىز قازاقستاننىڭ ساياسي-الەۋمەتتىك جانە رۋحاني ومىرىندەگى داتالى كۇندەر مەن قاپالى ساتتەردىڭ، وقيعالاردىڭ بارلىعى دا بولاشاق ۇشىن كوركەمسۋرەتتى تاريحقا اينالاتىنى سوزسىز. دەمەك، سول وقيعالاردى تاسپاعا تۇسىرگەن فوتوتىلشىلەردى، ياكي كاسىبي فوتوسۋرەتكەرلەردى تاريحتى دا تاسپاعا تۇسىرۋشىلەر دەۋگە تولىق نەگىز بار»، – دەيدى كىتاپتىڭ قۇراستىرۋشىسى، «فوتوونەر» قوعامدىق بىرلەستىگىنىڭ توراعاسى اسىلحان ابدىرايىمۇلى.

ادەتتە، قالىڭ كوپشىلىك فوتوسۋرەتى كورسە دە ونى كىم تۇسىرگەنىن بىلۋگە تىرىسپايدى. سەبەبى بىز كاسىبي مامانداردىڭ ەڭبەكتەرىمەن جاقىنىراق تانىسۋ ارقىلى ەل تاريحىنان دا حاباردار بولۋعا بولاتىنىن بىلە بەرمەيمىز. «قاسىمبەك نۇربەكۇلى، سوۆەتبەك ماعزۇموۆ، بەرسىنبەك سارسەنوۆ، تالعاتبەك اسانوۆ، ەربولات شادراحوۆ، شۇكىر شاحاي، بولات وماراليەۆ، سايلاۋ مايلىباەۆ پەن امانگەلدى مۋتيگۋللين سەكىلدى جالپى سانى 21 مايتالمان فوتوگرافتاردىڭ وسى جيناققا ەنگەن شىعارمالارىنان ەل مەن جەردى شەكسىز سۇيۋدىڭ ۇلگىسىن كورۋگە بولادى»، – دەدى ول.

جيناقتىڭ العى سوزىن ال-فارابي اتىنداعى قازۇۋ رەكتورى، اكادەميك عالىمقايىر مۇتانوۆ جازسا، جاۋاپتى رەداكتورى وسى ۋنيۆەرسيتەتتىڭ جۋرناليستيكا فاكۋلتەتىنىڭ دەكانى – س. مەدەۋبەكۇلى.

«قازاق ۋنيۆەرسيتەتى» باسپا ۇيىندە باسىلىپ شىققان جيناق جۋرناليستيكا فاكۋلتەتتەرىنىڭ ستۋدەنتتەرى مەن قالىڭ كوپشىلىككە ارنالعان.

فوتو: ەربولات شادراحوۆ

       

پىكىر جازۋ