.

سولتۇستىك بۇعىلارىمەن سەرۋەندەگىڭىز كەلسە…

بيىلعى قىس تازا اۋامەن تىنىستاپ، تابيعات اياسىندا سەرۋەندەۋدى ۇناتاتىن استانالىقتار مەن قالا قوناقتارى ۇشىن توسىنسىيعا تولى بولدى. بيىل جاڭا جىل قارساڭىندا استانادا جىلداعىداي 3 مۇز قالاشىعىنان بولەك، اشىق اسپان استىندا ونداعان مۇز الاڭقايلارى ەسىگىن ايقارا اشتى. ودان بولەك ەكسپو اۋماعىندا استانا قالاسىنداعى ەڭ ۇلكەن مۇز ايدىنى ىسكە قوسىلدى. جالپى اۋماعى 4 000 شارشى مەتردى قۇرايتىن مۇز ايدىنى بىر مەزەتتە 700-گە دەيىن ادامدى قابىلداي الادى. ال ەڭ قىزىعى تۇرعىنداردىڭ استانانى قاق جارىپ وتەتىن ەسىل وزىنىڭ ۇستىمەن شاناعا جەگىلگەن سولتۇستىك بۇعىلارىنىڭ جۇيتكىپ بارا جاتقاندارىن كورۋى بولدى.

بۇعان دەيىن تەك سولتۇستىك قازاقستان وبلىسى اۋماعىندا عانا كىسى تاسىپ كەلگەن بۇعىلار بيىل استانا ىشىندەگى ەسىلدىڭ بويىنا جايعاستى. «سولتۇستىك بۇعىلارى  الدىنا سالىنعان كەز كەلگەن جەم-شوپتى جەي بەرمەيدى. نەگىزگى قورەگى قايىڭ جاپىراعى جانە جابايى جيدەك بولعاندىقتان ولاردى اسىراۋ كوپ كۇش-جىگەردى، مول قارجىنى تالاپ ەتەدى، – دەيدى بۇعىلاردىڭ يەسى رەنات دۇيسەمبينوۆ. – سۋىقتى جاقسى كورەتىن جانۋارلار اۋا تەمپەراتۋراسى -10 گرادۋسقا جوعارىلاسا بولدى، تىنىسى تارىلىپ قينالاتىندىقتان، جازدى كۇندەرى كونديتسيونەر ورناتىلعان قوراعا قامالادى».

ورتاشا سالماعى 130-140 كگ، دەنەسىنىڭ ۇزىندىعى 220 سانتيمەترگە دەيىن جەتەتىن بۇل بۇعىلار قازاقستانعا وسىدان بەس جىل بۇرىن رەسەيدىڭ يامال-نەنەتس اۆتونومدى وكرۋگىنا قاراستى سالەحارد قالاسى ماڭىنان اكەلىنىپتى.

سولتۇستىك بۇعىلارىن جاقىننان كورىپ، شانامەن سەرۋەندەگىڭىز كەلسە، ناۋرىز ايىنىڭ سوڭىنا دەيىن ەسىل وزەنىنىڭ جاعالاۋىنا بارۋعا اسىعىڭىز.

 

فوتو: ەربولات شادراحوۆ


ماقالانىڭ تولىق نۇسقاسى مەن الەمدىك زەرتتەۋلەردىڭ قاينار كوزىنە قول جەتكىزگىڭىز كەلسە، shopnationalgeographic.kz ارقىلى ونلاين جازىلىڭىز.

       

پىكىر جازۋ