.

قانات ىزى

سكوگافوسس سارقىراماسىنان جوعارى ۇشىپ بارا جاتقان سولتۇستىك شاعالاسى نايزاعايعا ۇقساس ىز قالدىرادى.

قۇستاردىڭ اۋەدەگى كوزگە كورىنبەس ىزدەرىن سۋرەتكە تۇسىرۋمەن اينالىساتىن فوتوگرافپەن تانىسىڭىز.

Eگەر قۇستار اسپاندا ىز قالدىرار بولسا، ول قالاي كورىنەر ەدى؟ بۇل سۇراق بارسەلونالىق فوتوگراف كساۆي بوۋدى جىلدار بويى تولعاندىردى. «جىلاننىڭ قۇم ۇستىمەن سىر­عىعان كەزدە قالاتىن يرەلەڭدەگەن ىزى تارىزدى اسپان الەمىندە سامعاپ جۇرگەن قۇستاردىڭ دا وزىندىك بەلگىسى بولۋى تيىس»، – دەپ پايىمدايدى ول. بىراق ارنايى قۇرالداردىڭ كومەگىنسىز كوككە قانشا كوز تىككەنىمىزبەن ۇشىپ جۇرگەن قۇستاردىڭ ىزىن كورە المايتىنىمىز انىق. 38 جاستاعى بوۋ سوڭعى بەس جىلىن قۇستار سوڭىنداعى تۇسىنىكسىز بەينەنى سۋرەتكە تۇسىرۋگە ارناپتى. وز سوزىمەن ايتقاندا، ول بەلگىسىزدى بەلگىلى ەتۋ جولىندا كۇشىن سارپ ەتىپ جۇر.

كەزقۇيرىق ىزى اۋەدەگى جىلانداي كورىنەدى. يسپانيياداعى جابايى ومىرگە باي ەستاني د’يۆارىس-ي-ۆيللا سانا ەلدى مەكەنىندەگى سازدى جەر 1950 جىلدارى اۋىل شارۋا­شىلىعى كەڭ ەتەك جايعان كەزدە توزىپ كەتسە، ال 2005 جىلى قايتا قالپىنا كەلدى.

ول بەينەكامەرامەن جۇمىس ىستەۋدى قۇپ كورەدى. قۇستاردىڭ قوزعالىس كەزىندەگى ارەكەتىن تاسپاعا تۇسىرگەن سوڭ بوۋ ۆيدەوەپيزودتىڭ بىر بولىگىن تاڭداپ الىپ، جەكە كادرلاردى بىر سۋرەتكە توپتاستىرادى. بۇل پروتسەستى ول فيلم جاساۋ دەپ ەسەپتەيدى. بوۋ سوڭعى ناتيجەنىڭ قالاي بولاتىنىن الدىن الا ايتا المايدى.

بىزتۇمسىق شاعالادان باستاپ، تورعايعا دەيىن فوتوگراف كساۆي بوۋدىڭ نىساناسىنا ىلىندى. ول سۋرەتتەردى ويداعىداي شىعارۋ ۇشىن جوعارى ساپالى بەينەكامەرا قولدانادى. بوۋ بالا كەزىندە بارسەلوناعا جاقىن لوبرەگات-ريۆەر-دەلتا اۋىلىندا تۇراتىن اتاسىمەن بىرگە سەرۋەنگە شىعىپ، ۇزاق ۋاقىت جۇرەتىن. ونىڭ قۇس ىزىنە قۇمارلىعى سول كەزدەن باستالدى.

ول «ورنيتوگرافييا» دەپ اتالاتىن بۇل جوبانى باستاماس بۇرىن بارسەلونادا گەولوگييا جانە فوتوسۋرەت سالاسىندا عىلىمي اتاققا يە بولعان. كەيىن ول سان الەمىندە جارىق تۇسىرۋشى مامان رەتىندە جۇمىس ىستەپ، كينو تۇسىرەتىن «پوست­پروداكشن» ستۋديياسىنىڭ سەرىكتەسى بولدى. ونىڭ قازىرگى جۇمىسى اۋەس ىسى مەن ماماندىعىن ۇشتاستىرىپ تۇر. «بۇل – تەحنيكالىق قيىن ارى قىزىقتى كاسىپ. بۇل – وز قالاۋىمداعىداي تابيعات پەن سۋرەتتىڭ بايلانىسى»، – دەيدى.

يسپانييا. روزا قالاشىعىنىڭ ماڭىنداعى شاعالالار جاساعان تاڭعاجايىپ بەينە.

اۆتور: كاترين تسۋكەرمان، فوتو-يلليۋستراتسييالار: كساۆي بوۋ


ماقالانىڭ تولىق نۇسقاسى مەن الەمدىك زەرتتەۋلەردىڭ قاينار كوزىنە قول جەتكىزگىڭىز كەلسە، shopnationalgeographic.kz ارقىلى ونلاين جازىلىڭىز.

       

پىكىر جازۋ