.

اتالىعى مەن انالىعىن اجىراتۋ مۇمكىن ەمەس

قىزىل يبيستەردىڭ باسقا قۇستاردان ايىرماشىلىعى – ولاردىڭ تۇر-تۇسى مەن دەنە بىتىمىنە قاراپ، قايسىسى اتالىق، قايسىسى انالىق ەكەنىن اجىراتۋ مۇمكىن ەمەس. تۇمسىعىنان، قاناتىنىڭ ۇشىنا دەيىن قىزىل تۇسكە بويالعان بۇل قۇستاردىڭ ۇزىندىعى 60-70 سانتيمەتر ارالىعىندا بولسا، ال سالماعى 1،4 كيلوگرامعا دەيىن بارادى.

وزدەرى مەكەندەيتىن اۋماقتارىن بەلگىلەپ الىپ، سول جەردە توپتاسىپ ومىر سۇرۋگە داعدىلانعان ولاردىڭ نەگىزگى قورەگى ۇساق بالىق، باقا-شايان، مولليۋسكالار، كرابتار مەن شىبىن-شىركەيلەردەن تۇرادى. يبيستەر تۇر-تۇسىنىڭ بىركەلكى بولۋىنا قورەك قۇرامىنداعى «كاروتينويدتەر» دەپ اتالاتىن ورگانيكالىق پيگمەنتتەردىڭ شامادان تىس كوپ بولۋىنىڭ اسەرى بار. بىر ماۋسىمدا ارى كەتكەندە 1-3 جۇمىرتقا عانا باسىپ شىعارادى. بالاپاندارىنىڭ تۇسى العاشقى جىلدارى قوڭىر بولسا، قىزىل تۇسكە ارادا بىر جىل وتكەندە بارىپ بويالادى.

قىزىل يبيستەردى وڭتۇستىك امەريكاداعى ۆەنەسۋەلا، برازيلييا ەلدەرىنەن باسقا، ترينيداد ارالىندا عانا كورۋگە بولادى. باسقا ماتەريكتەردە كەزدەسپەيدى.

حالىقارالىق تابيعاتتى قورعاۋ وداعى كەلتىرگەن مالىمەتتەرگە قاراعاندا، دال قازىرگى ۋاقىتتا ولاردىڭ سانى 100-150 مىڭ ارالىعىندا بولسا كەرەك.

فوتو: جاينار داركەمباەۆ


ماقالانىڭ تولىق نۇسقاسى مەن الەمدىك زەرتتەۋلەردىڭ قاينار كوزىنە قول جەتكىزگىڭىز كەلسە، shopnationalgeographic.kz ارقىلى ونلاين جازىلىڭىز.

       

پىكىر جازۋ