.

گۇلدەنە بەر، استانا!

قازاق حالقىنىڭ مىڭجىلدىق تاريحىنا قانىعىپ، سالت-داستۇرىنەن ماعلۇمات العىڭىز كەلسە، جادىراعان جازدا استانانىڭ ۇستىمەن ۇشىپ وتىڭىز. وندا سىز سان تۇرلى بوياۋعا كومكەرىلگەن ۇلتتىق ويۋ-ورنەكتەردى كورە الاسىز.

سوڭعى 20 جىلدا استانالىقتاردىڭ سانى 4 ەسە، بالا تۋۋ كورسەتكىشى 6 ەسەگە دەيىن ارتىپ، قالا حالقىنىڭ سانى 1 ميلليوننان استى. ال وسى ارالىقتا شاھار ىشىندە وتىرعىزىلعان اعاشتار سانى دا ەسەلەپ كوبەيىپ، 2 ميلليونعا جۋىقتاعان. بۇل سانداردان بىز ەگىلگەن اعاشتار مەن وسىپ كەلە جاتقان ۇرپاقتىڭ وزارا «دوس­تىق باسەكەگە» تۇسكەنىن بايقايمىز.

استانا قالاسى اكىمدىگى قالا ىشىندەگى گۇلزارلارعا ەرەكشە مان بەرىپ كە­لەدى. جىل سايىن ورتا ەسەپپەن 7-10 ميلليون بىر جىلدىق گۇلدەر وسىرىلەدى.

ال تۇقىم سەبۋ، سۋارۋ، قوپسىتۋ، وتاۋ جانە تىڭايتۋ جۇمىستارىنا جازدى كۇندەرى ورتا ەسەپپەن 1700-گە جۋىق قىزمەتكەر جۇمىلدىرىلادى.

«دەكوراتيۆتى فيگۋرالاردىڭ سان تۇرىن كورگىڭىز كەلسە، وسى مەكەمەگە قاراستى «پرەزيدەنت باعى»، «اراي» مەن «جەرۇيىق» ساياباعىن، «قازاق ەلى» الاڭى، «عاشىقتار» سايا­باعى، «اقوردا» مەن باسقا دا گۇلزارلاردى ارالاپ قايتساڭىزدار بولادى»، – دەيدى استانا قالاسىنىڭ اكىمى اسەت يسەكەشەۆ، – مۇنداي كورىنىس­تەر جازدىڭ جىلى لەبىمەن بىرگە ادامدى راقاتقا بولەيدى».

استانا قالالىق № 71 مەكتەپ-ليتسەيىنىڭ وقۋشىلارى قالاداعى گۇلزارلاردى ارالاپ، قىدىرىپ قايتتى. ولار ۇلتتىق ناقىشتاعى ويۋ-ورنەكتەرمەن تانىسىپ، سۋرەتكە تۇسۋدى دە ۇمىتقان جوق.

«گۇل ەگۋ ماۋسىمى اياقتالعان شاقتا قوبىز، قالپاق، بيشى قىزدار، بۋتسى مەن دوپ، اتەش، پىل پىشىندەس فيگۋرالار قالانىڭ ار جەرىنە ورناتىلادى. ال دەكوراتيۆتى فيگۋرالار جەل مەن كۇنگە وڭىپ كەت­پەۋى ۇشىن تىڭايت­قىشتىڭ تۇر-تۇرى پايدالانىلادى.

182 مىڭ شارشى مەتر جەرگە گۇل ەگىلسە، 860 مىڭ شارشى مەتر­گە گازون مەن 10 مىڭ تۇپ كوشەت وتىر­عىزىلعان. «مۇنداي اۋقىمدى جۇمىستاردى اتقارۋ ۇشىن الدىمەن ديزاينەرلىك جۇمىستار جاسالادى، – دەيدى استانا اكىمىنىڭ ورىنباسارى ەرمەك امانشاەۆ. – سونىڭ ارقاسىندا بۇگىندە گۇل وسىرۋدىڭ ۇلتتىق ناقىشتاعى داستۇرى قالىپتاسىپ كەلە جاتىر».

تالاپقا سايكەس بىر شارشى مەتر جەرگە از دا ەمەس، كوپ تە ەمەس 43 دانا گۇل ەگىلۋى تيىس. ودان بولەك گۇلدەردىڭ اراقاشىقتىعى مەن تۇر-تۇسىنە قاراي ار گۇلدىڭ وز ورنىندا ەگىلۋى قاتاڭ قاداعالانادى.

گۇلدەر ارنايى قۇتىلاردان وسىپ شىققانعا دەيىن بىرنەشە كەزەڭنەن وتەدى. ەڭ الدىمەن، الداعى ماۋ­سىمداردا ەگىلەتىندەرىنىڭ ورنى مەن اۋماعى انىقتالادى. ودان كەيىن سانى شىعارىلىپ، گۇلدەردىڭ تۇر-تۇسى ەسەپكە الىنادى.

12 جىل بۇرىن موڭعولييادان كوشىپ كەلگەن ەلۋباي ابدىراش ەسىمدى ازامات جۇبايى­مەن بىرگە استانانى كوگالداندىرۋعا اتسالىسىپ جۇر. كۇن سايىن استانادان 60 شاقىرىم جەردەگى شورتاندى اۋىلىنان كەلىپ جۇمىس ىستەيتىن ەڭبەكقور ازاماتى: «بۇل – ەلىمىزدەگى بەيبىت زامان مەن استانامىزدىڭ كۇن وتكەن سا­يىن اجارلانىپ، كوركەيە تۇسۋىنىڭ ارقاسى. لايىم، قۋانىشىمىز ورتايماسىن!» – دەيدى.

ادەتتە، ەۋروپا ەلدەرىنىڭ استانالارى كونە قامالدار، ەسكەرتكiشتەر مەن تاريحي نىساندارىمەن ەرەكشەلەنەدى. ال قۇرىلعانىنا ەندى عانا 20 جىل تولعان استانانىڭ ىشى-سىرتى سان-الۋان گۇلدەرمەن بەزەندىرىلگەن.

اسەم شاھاردىڭ شىرايىن كەلتىرۋ ۇشىن نازىك گۇلدەر العاشقى قار تۇسكەنگە دەيىن بابىندا بولۋى كەرەك. جەلدىڭ قاتتى سوعۋى، كۇننىڭ كۇرت ىسىپ كەتۋى نەمەسە كەنەتتەن ۇcىك جۇرۋ مۇنداي گۇلدەرگە وڭاي تيمەسى انىق.

استانا كۇنى قارساڭىندا قالا ورتالىعىندا بوتانيكالىق ساياباق تا پايدالانۋعا بەرىلەتىن بولادى.

«بوتانيكالىق ساياباقتى جاساۋ يدەياسى مەملەكەت باسشىسىنا تيەسىلى. سوندىقتان بۇل اۋماق تۇرعىندارعا بارىنشا قولايلى بولۋى شارت»، – دەدى استانا اكىمى اسەت يسەكەشوۆ.

وسى سۋرەتتە سول ساياباقتىڭ ماكەتى كورسەتىلگەن.

جالپى اۋماعى 87 گەكتارعا تەڭ ساياباقتىڭ باس جوسپارىندا 2 بالالار الاڭقايى، 20 ترەناجەر، 2 فۋتبول، 4 تەننيس، 4 ۆولەيبول جانە 2 باسكەتبول الاڭى، 14،2 شاق. ۆەلوجول، 18 اەروديناميكالىق سۋبۇرقاق پەن WI-FI شاشاتىن ورىندىقتار قويىلاتىن بولادى.


ماقالانىڭ تولىق نۇسقاسى مەن الەمدىك زەرتتەۋلەردىڭ قاينار كوزىنە قول جەتكىزگىڭىز كەلسە، shopnationalgeographic.kz ارقىلى ونلاين جازىلىڭىز.

       

پىكىر جازۋ