.

تامشىلى

ماڭعىستاۋدا عاجايىپ بىر جەر بار. ول – تامشىلى شاتقالى. ونىڭ عاجايىپ بولاتىن سەبەبى مىنادا. ەستە جوق ەسكى زاماندا ۇستىرتتىڭ ۇستىندەگى ەنى 150، ال ۇزىندىعى 500 مەتردەي اۋماق جەر استىنا ويىلىپ تۇسىپ كەتكەن سيياقتى. سونىڭ ناتيجەسىندە مۇندا بىر جاعى بيىك كەرەگەتاسپەن تۇيىقتالعان كەۋەك ۇڭگىر پايدا بولىپتى. وسى ارادا ەگەر شاڭىراعى مەن ۋىعى جوق دەمەسەڭىز ونىڭ كادىمگى كيىز ۇيدەن اۋمايتىنىن دا ايتا كەتكەن جون.

تامشىلىنىڭ وسى كورىنىسىنىڭ وزى بىر كەرەمەت! سودان كەيىن، يا، سودان كەيىن اسپان استىنداعى تابيعي كيىز ۇي – توبەسى اشىق بۇل ۇڭگىردىڭ كورگەن جاندى ەرەكشە تاڭعالدىراتىن تاعى بىر قاسيەتى بار. ول ونىڭ تورىندەگى قابىرعانىڭ ون بويىنان شىپ-شىپ شىعىپ، تومەن قاراي ساۋلاپ اعىپ تۇرعان مىڭ سان مولدىر تامشىلار. شاتقالدى تۇيىقتايتىن قىرتىس-قىرتىس قاباتتارعا بۇل سۋ قايدان كەلىپ تۇر، ول ەندى تۇسىنىكسىز، جۇمباق، قۇپييا قۇبىلىس. بۇكىل قابىرعا مولت-مولت ەتە تەرلەپ، كەي جەرلەرى تىپتى قالا گۇلزارلارىنداعى فونتان-بۇرقاقتىڭ تۇتىگى سيياقتى مۇزداي تامشىلاردى توڭىرەگىنە دىزىلداتا بۇركىپ تۇر.

قابىرعادان تومەن قاراي ساۋلاعان سول مىڭ سان تامشىلار شاتقالدىڭ ەتەگىنە جينالادى. جينالىپ كىشكەنە تۇما بۇلاققا اينالادى. سودان سوڭ سايدى كۋالاي اعىپ، ونىڭ اۋزىنا كەلگەندە قولدان جاسالعان توسپاعا بوگەلەدى. سويتىپ، وسى توسپا ۇستىرتتەگى مالشى قاۋىمىن اۋىز سۋمەن قامتاماسىز ەتەدى.

دال وسىنداي قۇبىلىس ماڭعىستاۋدان باسقا تاعى قاي جەردە بار دەيسىز عوي؟ الماتى وبلىسىنىڭ قاپال سەلوسىنداعى سايدا اينا-قاتەسى جوق تامشىبۇلاق قايتالانىپ تۇر. ول دا ۇستىرت ۇستىندەگىدەي توڭىرەگىنە مىڭ سان مولدىر تامشىلاردى بۇركىپ، وزىنىڭ قۇپييا تىرشىلىگىمەن ومىر سۇرۋدە. سۋى مۇزداي عاجايىپ تۇمانىڭ سىرىن كىم اشادى؟ جاۋابى جوق جۇمباق بۇل…

اۆتورى: جانبولات اۋپباەۆ

فوتو: اندرەي استافەۆ

       

پىكىر جازۋ