.

«ماعجان جىلى» حالىقارالىق دەڭگەيدە اتاپ وتىلدى

2018 جىل تۇركىتىلدەس مەملەكەتتەر اراسىندا «ماعجان جىلى» اتالعانى بەلگىلى. «تۇركسوي» ۇيىمىنىڭ مۇرىندىق بولۋىمەن باستالعان بۇل شارا تۇركييادان باستالىپ، باسقا ەلدەردە دە جاعالاي جالعاسىپ كەلەدى.

سۇلۋ سوز بەن سىرلى ويدىڭ جۇيرىگى، جازىقسىزدان-جازىقسىز قاندى رەپرەسسييانىڭ قۇربانىنا اينالعان ماعجان اقىننىڭ مەرەيتويى سولتۇستىك قازاقستان وبلىسى اكىمدىگىنىڭ ۇيىمداستىرۋىمەن حالىقارالىق دەڭگەيدە دۇركىرەپ وتتى. مادەني-رۋحاني ىس-شارالار دۇيىم جۇرتشىلىق تاراپىنان زور ريزاشىلىق پەن جوعارى باعاعا يە بولدى. شارا ماعجان جۇماباەۆتىڭ وزى كوزى تىرىسىندە ەڭبەك ەتكەن بىلىم ورداسىندا باستالىپ، ۇلى اقىننىڭ ەسكەرتكىش مۇسىنىنىڭ اشىلۋىمەن جالعاستى. ول اكادەميك ماناش قوزىباەۆ اتىنداعى سولتۇستىك قازاقستان مەملەكەتتىك ۋنيۆەرسيتەتى جانىنداعى گۇلزاردا ورىن تەپتى. پوەزييا پاديشاسىنا ارنالعان قولا مۇسىننىڭ تۇعىرىنا قونۋىنا دەمەۋشىلىك كورسەتكەن بەلگىلى كاسىپكەر ب.شايمەردەنوۆ.

وبلىستىق تاريحي-ولكەتانۋ مۇراجايىندا «ۇلتىن سۇيگەن ۇلى جۇرەك» كورمەسى، تەاترلاردا «شولپاننىڭ كۇناسى» جانە «ماعجاننىڭ سوتى» سپەكتاكلدەرى قويىلدى.

مولودەجنىي ەلدىمەكەنى جاستار بولىپ وزگەرتىلىپ، اۋىلدىق وكرۋگىنە ماعجان جۇماباەۆ ەسىمى بەرىلدى. وڭىردەگى باسقا دا بىرقاتار اتاۋلار قازاقشالانىپ، ابىلايحان، تولە بي، باتىر بايان، احمەت بايتۇرسىنوۆ، دىنمۇحامەد قوناەۆ، باۋىرجان مومىشۇلى، مۇقاعالي ماقاتاەۆ، شامشى قالداياقوۆ سەكىلدى بىرتۋار تۇلعالاردىڭ ەسىمدەرىن يەلەندى.

سالتاناتتى راسىمدى وبلىس اكىمى قۇمار ىرگەبايۇلى اقساقالوۆ كىرىسپە سوزبەن اشىپ، مەملەكەت باسشىسىنىڭ مەرەيتويعا ارنالعان قۇتتىقتاۋ حاتىن وقىپ بەردى. «تۇركسوي» حالىقارالىق ۇيىمىنىڭ باس حاتشىسى دۇيسەن قاسەيىنوۆ جۇرەكجاردى سوزىن جەتكىزدى.

فوتو: سقو اكىمدىگىنە تيەسىلى

       

پىكىر جازۋ