.

تۋعان كۇنىڭ قۇتتى بولسىن اسەم قالا – استانا!

قازاق حالقىنىڭ باعىنا بالانعان ەلوردامىز استانا بيىل 20 جاسقا تولىپ وتىر. البەتتە، بۇل ۋاقىت تاريح ۇشىن قاس-قاعىم ساتتەي عانا بولىپ كورىنگەنىمەن، بۇگىندە استانا داۋلەتى تاسىپ، ساۋلەتى اسقان جەر جاھانداعى سۇلۋ شاھارلاردىڭ بىرىنە اينالىپ وتىر.

ستاتيستيكالىق مالىمەتتەرىنە قاراعاندا، سوڭعى 20 جىلدا استانالىقتار سانى 300 مىڭنان 1 ملن 100 مىڭعا دەيىن وسسە، ال قالا اۋماعى 254-تەن 800 شارشى شاقىرىمعا جەتىپ وتىر. قالا تورت اۋداننان – «الماتى»، «سارىارقا»، «ەسىل» جانە «بايقوڭىر» اۋدانىنان تۇرادى.

ەلوردامىز وزىنىڭ جاستىعىنا قاراماستان وسى كۇنگە دەيىن حالىقارالىق ماڭىزى بار تۇرلى فورۋمدار،  كونگرەستەر مەن وزگە دە ىس-شارالار وتەتىن ەۋرازييا كەڭىستىگىنىڭ ورتالىعىنا اينالدى. الەمدىك جانە داستۇرلى دىندەر ليدەرلەرىنىڭ سەزى، استانا ەكونوميكالىق فورۋمى جانە وزگە دە ماڭىزدى حالىقارالىق وقيعالار تۇراقتى تۇردە وتىپ كەلەدى.

قازاقستاننىڭ تۇڭعىش پرەزيدەنتىنىڭ يدەياسىمەن ىرگەسى قالانعان جاڭا ەلوردا قىسقا مەرزىم ىشىندە جالپىۇلتتىق يدەيا مارتەبەسىنە يە بولىپ، جاس مەملەكەتتىڭ تاۋەلسىزدىگىنىڭ سيمۆولىنا جانە جاhاندىق تابىسىنا اينالدى.

نۇرسۇلتان نازارباەۆ استانانىڭ 10 جىلدىق مەرەيتويىنا ارنالعان وزىنىڭ باعدارلامالىق سوزىندە جاڭا ەلوردالىق قالانىڭ دامۋ فيلوسوفيياسىن وتە انىق جانە بەينەلى تۇردە ايقىنداپ بەردى: «وسىندا ەجەلگى سارىارقا جەرىندە تەك استانا ەمەس، ەلىمىزدىڭ بولاشاق بەسىگى ومىرگە كەلدى. استانا تاريحى مەن قازاقستاندىقتاردىڭ تاعدىرى بىر-بىرىنەن اجىراعىسىز. ەلوردا بىزدىڭ رەسپۋبليكامىزدىڭ كۇش-قۋاتىنىڭ ىسكە اسۋىنىڭ، ديناميكالىق دامۋىنىڭ جانە تۇراقتىلىعىنىڭ كورىنىسى. استانا بارشا قازاقستاندىقتاردى بىرىكتىرەتىن جانە العا قاراي قادام باسقان جارقىن، قۋاتتى، گۇلدەنگەن قالاعا اينالدى. بىزدىڭ ەلوردامىز وتانىمىزدىڭ جۇرەگى، حالىقتىڭ وز كۇشىنە سەنىمى مەن ۇلى تاعدىر-تالايىنىڭ سيمۆولى بولىپ تابىلادى. بۇگىندە استانادا، قازاقستاننىڭ بارلىق وڭىرىندەگى سيياقتى، جۇزدەن استام ۇلت وكىلدەرى ومىر سۇرەدى. حالىقتار دوستىعى، وزارا تۇسىنىستىك جانە ىنتىماقتاستىق – استانانى جانە جاڭا قازاقستاندى قۇرۋدىڭ نەگىزى، مىنە، وسىلار».

جالپى، استانا كۇنىن مەملەكەتتىك مەرەكە دەپ جارييالاۋدىڭ تاريحي، تانىمدىق، تاربيەلىك تۇرعىدان مانى ايرىقشا زور. ەلوردانى الماتىدان اقمولاعا كوشىرۋ – بۇل قازاقتىڭ وز قولى وز اۋزىنا جەتكەنىن عانا ەمەس، ۇلتتىڭ بولمىس-بىتىمىن ساقتاپ، مەملەكەتتىڭ كەلەشەگىن كەمەلدەتۋ ماقساتىندا جاساعان اۋقىمدى شاراسى ەكەنىن بىلدىرسە كەرەك. ال تانىمدىق تۇرعىسىن سوز ەتەتىن بولساق، ەلوردامىزدى كوشىرۋ ارقىلى بىز تاۋەلسىزدىگىمىزدى نىعايتتىق، ولگەنىمىزدى تىرىلتىپ، وشكەنىمىزدى جاڭعىرتقانداي بولدىق.

استانانىڭ تۋعان كۇنى 1998-2006 جىلدار ارالىعىندا 10 ماۋسىمدا تويلانىپ كەلگەن بولسا، 2006 جىلدان بەرى 6 شىلدە دە اتالىپ وتىلەدى.

       

پىكىر جازۋ