.

استانانى الەمگە تانىتۋعا ارنالعان – «PHOTOfest.KZ»

«استانا – شەتەلدىك فوتوگرافتاردىڭ وبەكتيۆىندە». دال وسىنداي اتاۋمەن «بايتەرەك» مونۋمەنتىنىڭ الدىندا ىى حالىقارالىق «PHOTOfest.KZ» فوتوكورمەسى سالتاناتتى تۇردە اشىلدى. وعان قازاقستاندىق فوتوگرافتاردان بولەك فرانتسييا، يتالييا، گەرمانييا، انگلييا، رەسەي، ارمەنييا، ازىربايجان، قىتاي مەن جاپونييا سەكىلدى ەلدەردىڭ وكىلدەرى قاتىستى.

قر مادەنيەت جانە سپورت مينيسترلىگىنىڭ قولداۋىمەن بيىل ەكىنشى رەت ۇيىمداستىرىلىپ وتىرعان كورمەگە بارلىعى 200-گە جۋىق تۋىندى قويىلعان. جەر-جاھاننىڭ تۇكپىر-تۇكپىرىنەن كەلگەن 20-دان استام فوتوگراف 5-8 شىلدە ارالىعىندا استانانىڭ كورىكتى جەرلەرىن ارالاپ، سۋرەتتەردى ناقتى تاپسىرمامەن ەمەس، وز قالاۋى بويىنشا تۇسىرۋگە مۇمكىندىك الدى. استانانىڭ 20 جىلدىق مەرەيتويىنا وراي وتكىزىلگەن كورمەنىڭ ەرەكشەلىگى – فوتوگراف­تار تالىمگەرلىك ساباقتارىن دا وتكىزەتىن بولادى.

وسى جىلى فەس­تيۆال قاتىسۋشىلارىنىڭ قاتارىندا تۋىندىلارىمەن الەمگە تانىمال فوتو ونەر سالاسىنىڭ قىراندارى بارشىلىق. سولاردىڭ بىرى – ارمەنييا پرەزيدەنتىنىڭ جەكە فوتوگرافى داۆيد اكوپيان. ول قازاق­ستان پرەزيدەنتى نۇرسۇلتان نازارباەۆتىڭ ەرەكشە سۋرەتىن تۇسىرگەن ەدى.

«ەلور­دانىڭ ارحيتەكتۋرالىق ساۋلەت ونەرى مەن مادەنيەتىن، تاريحىن پاش ەتەتىن شەتەلدىك فوتوگرافتاردىڭ تۋىندىلارى استانامىز­دىڭ اجارىن اشىپ، الەمگە تانىتاتىنى سوزسىز»، – دەدى قر مادەنيەت جانە سپورت مينيسترى ارىستانبەك مۇحامەديۇلى.

فەستيۆال بارىسىندا الەۋمەتتىك جەلى­لەردە ارنايى فوتو-بايقاۋ دا جارييالانعان. بايقاۋعا قاتىسقىسى كەلگەندەر وزدەرىنىڭ فوتوسۋرەتتەرىن بايقاۋدىڭ پاراق­شالارىنا جىبەرلەرى تيىس.

حالىقارالىق فوتوكورمەنىڭ وتۋ ۋاقىتى – 1 اي.

فوتو: ەربولات شادراحوۆ.

       

پىكىر جازۋ