.

اكادەميك كارل بايپاقوۆ دۇنيەدەن وتتى

تانىمال عالىم، تاريحشى، قعا اكادەميگى، قازاقستاننىڭ ەڭبەك سىڭىرگەن قايراتكەرى كارل بايپاقوۆ دۇنيەدەن وتتى.

كارل مولداحمەتۇلى بايپاقوۆ 1940 جىلى الماتى وبلىسى تالعار قالاسىندا دۇنيەگە كەلگەن.

كارل بايپاقوۆ تاريح عىلىم دوكتورى، پروفەسسور (1995)، قازاقستان عىلىم اكادەميياسىنىڭ اكادەميگى (2003) جانە قر الەۋمەتتىك عىلىم اكادەميياسىنىڭ اكادەميگى (1996)، قازاقستاننىڭ ەڭبەك سىڭىرگەن عىلىم جانە تەحنيكا قايراتكەرى (1998).

1964 جىلى لەنينگراد مەملەكەتتىك ۋنيۆەرسيتەتىن بىتىرگەن. قازاقستان عىلىم اكادەميياسىنىڭ تاريح، ارحەولوگييالىق جانە ەتنولوگييالىق ينستيتۋتىندا كىشى (1966–1971)، اعا عىلىم قىزمەتكەرى (1971–1973)، بولىم مەڭگەرۋشىسى (1973-1988)، ارحەولوگييالىق ورتانىڭ جەتەكشىسى (1988–1991)، ينستيتۋت ديرەكتورىنىڭ ورىنباسارى (1991) قىزمەتتەرىن اتقاردى. 1991 جىلدان بەرى ارحەولوگييا ينستيتۋتىنىڭ ديرەكتورى.

ول «وڭتۇستىك قازاقستان مەن جەتىسۋدىڭ ورتاعاسىرلىق قالا مادەنيەتى (Vى–حVىىى عاسىرلار)» دەگەن تاقىرىپتا دوكتورلىق ديسسەرتاتسييا قورعادى. قازاقستاننىڭ ورتاعاسىرلىق قالالارى تاريحىن، قالا مەن دالا اراسىنداعى وزارا بايلانىستى زەرتتەپ، عىلىمدا جاڭا باعىتتى دامىتتى. بايپاقوۆ بىرنەشە حالىقارالىق كونفەرەنتسييالارعا قاتىستى (درەزدەن، 1984; ۆاشينگتون، 1986; توكيو، 1988; پاريج، 1992; بەيجىڭ، 1992).

يۋنەسكو ۇيىمداستىرعان «جىبەك جولى» حالىقارالىق ەكسپەديتسيياسىنا قازاقستان تاراپىنان جەتەكشىلىك ەتتى (1991). يۋنەسكو-نىڭ ورتالىق ازييا تاريحىمەن اينالىساتىن حالىقارالىق عىلىم كوميتەتى مەن «ۇلى جىبەك جولى» قازاقستان ۇلتتىق كوميتەتىنىڭ مۇشەسى.

بايپاقوۆ 22 مونوگرافييا، 200-دەن استام عىلىمي ماقالانىڭ اۆتورى.

ش.ش.ۋاليحانوۆ اتىنداعى سىيلىق لاۋرەاتى (1986). «پاراسات» وردەنىمەن ماراپاتتالعان.

ايتا كەتۋىمىز كەرەك، كارل بايپاقوۆ National Geographic قاۋىمداستىعىنىڭ قازاقستان بويىنشا گرانتىن ۇتىپ العان قازاقستاندىق ۇش عالىمىنىڭ بىرى. ول 1998 جىلى «وڭتۇستىك-شىعىس قازاقستاننىڭ جىبەك جولى بويىندا ورنالاسقان تالعاردىڭ توپوگرافييالىق زەرتتەۋلەر مەن قازبا جۇمىستارى»، 1999 جىلى «ورتاعاسىرلىق جىبەك جولى بويىنداعى قالالاردى جەرمەن جەكسەن ەتكەن جەرسىلكىنىسى» دەگەن تاقىرىپتا عىلىمي جۇمىستار جۇرگىزگەن.

فوتو: aikyn.kz

0

Publication author

offline 5 كۇن

ايبەك

0
Comments: 3Publics: 710Registration: 01-10-2016
       

پىكىر جازۋ

كىرۋ
*
*
تىركەلۋ
*
*
*
*
Password generation