.

تۇپكى ماقسات – تۋريزمدى تۇلەتۋ

قالىڭ ەلگە قوعامدىق قىزمەتىمەن ەتەنە تانىمال قاراعاندىلىق بەلگىلى شەبەر، «TEFA Eurasiaphoto» شىعارماشىلىق بىرلەستىگىنىڭ توراعاسى، National Geographic Qazaqstan جۋرنالى مەن «ۇلىتاۋ» ۇلتتىق تاريحي-مادەني جانە تابيعي قورىقمۋزەيىنىڭ فوتوسۋرەتشىسى دميتريي رۋگيس وزىنىڭ نيەتتەس سەرىكتەرىمەن بىرگە ۇلىتاۋ تاۋىنىڭ قاسيەتتى اۋليەتاۋ شىڭىن قىس ماۋسىمىندا باعىندىرۋ باستاماسىن ساتىمەن جۇزەگە اسىردى.

بيىكتىكتى باعىندىرۋ نۇكتەسى رەتىندە «ۇلىتاۋ» قورىق-مۋزەيىنىڭ قاداعالاۋ جانە قورعاۋ اۋماعىنداعى اۋليەتاۋ شىڭىنىڭ تاڭدالىپ الىنۋى، ارينە، بەكەردەن بەكەر ەمەس. ۇلىتاۋ – قازاقستاننىڭ گەوگرافييالىق ورتالىعى، ۇلت شەجىرەسىندەگى اسا ماڭىزدى وقيعالاردى وز باسىنان وتكەرگەن ارى تاريحي ەسكەرتكىشتەرى مەن كونە داۋىرلەردىڭ كوزىندەي جاۋھار جادىگەرلەرى اسا مول كيەلى وڭىر. سول سەبەپتى، بۇل جەرگە جۇرتشىلىقتىڭ قىزىعۋشىلىعىن تۋدىرىپ، تۋريزمدى دامىتۋ – الداعى مىندەتتەردىڭ ەڭ وزەكتىسى ھام بىرەگەيى. وسى ماقساتتا تۇرلى دەڭگەيدەگى اتقارۋشى بيلىك قۇرىلىمدارى تاراپىنان ورنىقتى اتقارىلىپ جاتقان الەۋەتتى ارەكەتتەر دە جەتىپ ارتىلادى. دەسەك تە، شەتەلدىكتەردى ايتپاعاننىڭ وزىندە، وتكەنى ورنەكتى وڭىردىڭ ونەگەلى تاريحىنان قازاقستاندىقتاردىڭ باسىم دەنى كۇنى بۇگىنگە دەيىن بەيحابار ەكەندىگى جاسىرىن ەمەس. بىزدىڭ پايىمداۋىمىزدا، قارلى بوران مەن قاقاعان ايازعا قاراماستان جىگەرلەرىن جانىپ، ىزگى نيەتتەرىن ىلكىمدى ىسكە اسىرعان ازاماتتاردىڭ ۇلى دالا ۇلىتاۋىنىڭ ۇلت تاريحىندا الار ەشقانداي باعالاۋ ولشەمىنە سىيماس ورنىن دارىپتەۋ باعىتىنداعى قاپىسىز قيمىلدارى – وتانشىلدىق پەن پاتريوتتىق ۇستانىمنىڭ ۇلگىسى. قالابەردى، ۇلت بەسىگىندە تۋريزمدى تۇلەتۋ شارالارىنا قوسىلعان تاتىمدى ۇلەس ەكەندىگى انىق.

– حالىق ۇعىمىنداعى كيەلى شىڭعا شىعۋ يدەياسىنا ۇلىتاۋ تابيعاتىنىڭ قىس ماۋسىمىنداعى سۋرەتتەرىن كورىپ، تاڭداي قاعا تامسانعان قازاقستاندىق Nomad Explorer ساياحاتشىلار كومانداسىنىڭ مۇشەسى اسەت سەيتماعامبەتوۆتىڭ ساۋالى تۇرتكى بولدى. ونى «اۋليەتاۋعا قالىڭ قار باسىپ جاتقان كەزدە كوتەرىلگەن جان بار ما؟» دەگەن سۇراق مازالاعان ەدى. كىم بىلسىن، بالكىم، بار دا شىعار… الايدا ول تۋرالى رەسمي تىركەلگەن دەرەكتەر، ەڭ باستىسى، قىس ماۋسىمىندا شىڭ باسىنان تۇسىرىلگەن فوتوسۋرەتتەر مەن بەينەماتەريالدار مۇلدەم جوق بولاتىن. سول سەبەپتى، وسى ولقىلىقتىڭ ورنىن تولتىرۋ تۋرالى وي كەلدى. كەز كەلگەن ىس-شارا پىكىرلەستەرمەن تىزە قوسا ارەكەت ەتكەندە عانا تولىمدى ناتيجە بەرەدى. مەنىڭ ۇسىنىسىمدى «TEFA Eurasiaphoto» شىعارماشىلىق بىرلەستىگىنىڭ مۇشەسى، ساياحاتشى-فوتوگراف تاحير مۇحتاروۆ پەن تەمىرتاۋ قالاسىنداعى «سپلاۆ» بۇقارالىق فوتوكلۋبىنىڭ جەتەكشىسى سەرگەي كوچمارەۆ قۇلشىنا قولدادى.

بۇل قادامنىڭ تۇپكى ماقساتى – تۋريزمدى، ونىڭ ىشىندە، ىشكى تۋريزمدى تۇلەتۋ. بۇعان قوسا، بيىلعى جىل – جاستار جىلى. سوندىقتان، جاس بۋىندى بوس ۋاقىتتارىن تيىمدى پايدالانۋعا قالىپتاستىرۋ، باتىل ارەكەتتەرگە باۋلۋ، تىڭ شىعارماشىلىق باعىتقا بەيىمدەۋ، سالاۋاتتى ومىر سالتىن ۇستانۋعا ۇندەۋ سەكىلدى قاجەتتىلىكتەردى دە ەسكەردىك. جۋىردا قاراعاندى قالاسى وزىنىڭ 85 جىلدىق مەرەيتويىن اتاپ وتتى. قالىڭ قاردى كەشىپ، شىڭعا شىققان بولماشى جەتىستىگىمىزدى سۇيىكتى شاھاردىڭ مەرەيلى تويىنا ارناعاندى جون سانادىق.

اۆتورى: احات قۇرمانسەيىتوۆ

0
       

پىكىر جازۋ

كىرۋ
*
*



تىركەلۋ
*
*
*
جاڭا قۇپييا سوز