Құрметті оқырман!
Қадірлі ата-ана мен жасөспірім достар!
Міне, Жасанды интеллект (ЖИ) дәуірінің тағы бір жылы да аяқталып қалды. ЖИ, ЖИ деп жиі айта бергеннен өміріміз жақсарып кетпейтінін түсініп жатырмыз. Оны игеру үшін де «талап, еңбек, терең ой» (Абай) мен сапалы білім керек. ЖИ-дің жалына жармасқан елдер жоқтан бар жасап, барын күн сайын дерлік байытып, нақты өмірдегі қолданысын жетілдіру жолында бәсекеге түсіп жатыр.
Яки сапалы материал, салмақты зерттеулерге деген сұраныс та, оларды оқып ізденудің өзектілігі де ешқашан жойылмайды.
Оқырман білімі мен танымын арттыруды басты міндеті санайтын Natinoal Geographic 2024 жылы да сол ұстанымынан айныған жоқ. Ғылым мен технологияның бет алысы мен соңғы жетістіктерін, жаңалықтарын ұдайы назарда ұстады. Репродукция, күйзеліс, қабыну сынды іргелі тақырыптар қатарында ЖИ-ге де бір нөмірін арнады. ЖИ-дің археология, тарих, медицина, ғарыш және сейсмология саласында қандай көмегі тиетінін, нендей түйткілдері бар екенін кеңінен тарқатып жазды. Күні кеше пайда болған Жасанды интеллектінің (ЖИ) көптеген саладағы қолданыс нәтижелері әлден-ақ әлемді таңғалдырып жатыр. Оның қазіргі қарқыны болашақтағы мүмкіндіктері медицина, ғарыш сияқты күрделі салаларда біз ойлағаннан да зор болатынын айғақтайды. Сол игіліктерден құр қалмас үшін бізге де көп ізденуге, сапалы білім алуға ұмтылу керек.
Сапалы, табысты өмір сүру үшін дұрыс шешімдер қажет екенін өмір ағысы – озық елдердің тәжірибесі әлдеқашан дәлелдеп қойған. Ал дұрыс шешімді сапалы әрі заманауи білім мен дағдыға, тәжірибеге сүйеніп қана қабылдауға болады.
Біз, Natinoal Geographic журналы, өз оқырмандарымыздың осындай дұрыс шешімдер қабылдай алатын сапалы адам болғанын қалаймыз. Сондықтан да журналымыздың әрбір санында адамзаттың болашағына әсер ететін түрлі ғылыми зерттеулерді қарапайым тілмен, көрнекі құралдармен – фото және инфографикалармен баяндауға тырысамыз.
Мұның бәрі әлемнің әр түкпірінде жұмыс істеп жатқан 4 мыңдай зерттеуші әзірлеп ұсынатын бірегей контент.
Журналымыздың әрбір саны мектеп бағдарламасындағы пәндердің кемінде екеу-үшеуіне қосымша танымдық материал бола алады.
Бұлар уотсап сияқты месенжерлер арқылы қолдан қолға өтіп жатқан түбі шикі, жалған дүниелер емес. Танымыңды арттырып, өреңді өсіретін нағыз білімнің қайнар көзі.
Осыны білетін мұғалімдер мен ата-аналар бізді тұрақты жаздырып алып тұрады. Каспи-дүкеннен сатып алады. Редакциямызға іздеп келеді.
Осындай оқырмандарымыздың арасында тіпті жыл сайын өзіне ғана емес, бірнеше бауырының балаларына да жаңажылдық сыйлық ретінде жаздырып беріп жүргендері де бар.
Біз осындай оқырмандарымыз арқылы марқаямыз. Шабыттанып, алға ұмтыламыз.
Осы ойлы оқырмандарымыздың қатары Жаңа 2025 жылы көбейе беретініне сенеміз.
Жаңа жыл баршаңызға құтты, қайырлы һәм берекелі, табысты жыл болсын!
Құрметпен,
Natinoal Geographic Qazaqstan
