Қазақстанның туризм саласының дамуына үлкен үлес қосқан «Дархан Дала» жобасы 10 жылдан бері эфирден тұрақты көрсетіліп келеді. 24KZ телеарнасында шығатын бұл бағдарлама еліміздегі туризм саласын қолдауға, жетістіктерін паш етіп, кеңінен танытуға арналған бірден бір тележоба. Қазақстанның табиғатын, тарихы мен бай мәдениетін көрсету арқылы туризм саласындағы маңызды оқиғаларды жан-жақты насихаттап жүрген бағдарлама авторлары биыл да жаңа маусымның түсірілімдеріне кірісіп кетті.
Жобаның 10 жылдық жұмысы барысында түсіру топтары 450 000 шақырымнан астам жол жүріп өтті, бұл Айға дейінгі қашықтықтан да көп! Бағдарлама Қазақстанның барлық аймақтарын қамтып, түрлі қалалар мен ауылдарды аралады. Жоба қатысушылары ел аумағының 80%-дан астамын аралап, әр сапар сайын тың дүниелер ашып, ұмытылмас әсерлі сәттердің куәсі болды.
Әрбір шығарылым саяхаттаушылар үшін тың жаңалық болатын ең көрікті, әсем жерлерді таныстырып, таңғажайып пейзаждарды жоғары сапада түсіруімен ерекшеленеді. Бүгінге дейін 1000-нан астам бағдарлама эфирге шығып, олар кең байтақ Қазақстанды тереңірек танып-білуге мүмкіндік берді.
Биыл «Дархан Дала» бағдарламасының жүргізушісі тағы бір ерекше саяхатқа шығады. Агенттіктің 30 жылдығына орай ұйымдастырылатын бұл саяхат 30 000 шақырымды қамтитын маңызды іс-шараға айналады.
Саяхат барысында әртүрлі аймақта кездесулер өткізіліп, жаңа және ескі туристік маршруттар зерттеледі. Тарихи маңызды орындар мен ерекше қорғалатын аумақтар таныстырылады. Әр аймақтың ерекшелігі, тарихы мен тұрғындары туралы жаңа деректер ұсынылады. Осылайша, бұл тележоба еліміздің мәдениеті мен туризмін кеңінен насихаттайтын медиаиндустриядағы маңызды алаң қызметін де атқарып отыр.
Сонымен, биыл елордадан сапарға аттанатын түсірілім жобасы сізді әйгілі Барсакелмес аралына алып барады. Жаңа маршруттарды зерттеу үшін елді мекендер мен қалаларды аралайды. Түркістан облысындағы көне мешіттер мен кесенелерді, қасиетті орындар мен аспан астындағы жәдігерлерді таныстырады.
Ал Сыр өңіріндегі тылсым табиғат, бірегей ландшафт пен ерекше жерлер тележоба авторларының келесі сапарына жоспарланған. Туристік мүмкіндіктерді зерттеп-зерделеп, әдемі табиғатпен және тарихы терең жергілікті дәстүрлермен де таныстыру жалғасады.
Сапар барысына «Хабар» Агенттігінің аймақтардағы тілшілер желісінің қызметкерлері де атсалыспақшы. Олар медиахолдингтің 30 жылдық мерейтойын атап өтуге арналған іс-шаралар ұйымдастырады.