.

قان جۇتقان ەل

ەسىرتكىگە قاتىسى بار كىسى ولىمىنە مانيلالىق ساراپشى كريميناليس­تەر جاناما ايعاقتار جيناۋدا. قازا تاپقان 41 جاستاعى انگەليتو لۋسيانو ەسىرتكىگە قارسى كۇرەس بويىنشا پوليتسيياعا كومەكتەسىپ جۇرگەن ەرىكتى ازامات بولاتىن.

ەسىرتكىگە قارسى كۇرەس فيليپپيندە كىسى ولىمىن كوبەيتىپ جىبەردى.

اۆتورى: اۋرورا المەندرال فوتو: ادام دين

جاڭالىقتاردان جول جيەگىندە سۇلاپ جاتقان ولى دەنەنى كورگەننەن-اق، ريك مەدينا الگىنىڭ 23 جاستاعى وزىنىڭ ۇلى ەريكاردو ەكەنىن ىشى سەزگەن. فيليپپين استاناسى مانيلاداعى داڭعىل بويىندا جاتقان بەيباقتىڭ قالانىڭ كەز كەلگەن تۇرعىنى بولۋى دا ابدەن مۇمكىن ەدى. بىراق تەلەديدار مايىتتىڭ تەك ارقاسىنان عانا كورسەتسە دە، اكە جۇرەگى بىر جاماندىقتى سەزگەندەي.

تاڭ اتا سالىسىمەن ريكتىڭ 26 جاستاعى قىزى دجوي مايىتحاناعا باردى. ەدەندە سەگىز ادامنىڭ دەنەسى قاز-قاتار تىزىلىپ جاتتى. ولاردىڭ بارى بىر جولمەن، بىردەي جاعدايدا جان ­تاپسىرعان: باستارىنا وراما لەنتا بايلانىپ، كوكىرەك تۇسى مەن مويىندارىنا بىرنەشە جەردەن مۇز تەسكىش سۇعىلعان. ەريكاردونىڭ دەنەسىندە قالعان كارتون بەلگى ونىڭ ەسىرتكى ساۋداگەرى بولعانىن كورسەتەدى. ال اكەسىنىڭ سوزىنشە، ەريكاردو ەشقاشان ەسىرتكىگە جاقىنداماعان، دجوي بولسا ونىڭ ەسىرتكىگە اراكىدىك اۋەس بولعانىن ايتادى. قالاي بولسا دا، قاندىقول قىلمىسكەرلەر ولاردى تەرگەپ-سوتتاماي-اق جازاعا كەسكەن.

مەدينا وتباسىنداعى قايعىلى جاعداي فيليپپيندە سوڭعى ۋاقىتتا سان مىڭ مارتە قايتالاندى. ەل پرەزيدەنتى رودريگو دۋتەرتو باسقا ۋادەلەرىمەن بىرگە ەسىرتكى ساۋداگەرلەرىنىڭ كوزىن جويىپ، قىلمىستى توقتاتۋعا سوز بەرگەن-دى. الايدا 2016 جىلدىڭ مامىرىندا سايلاۋدا جەڭىسكە جەتكەننەن بەرى ودان تۇرعىنداردىڭ كوڭىلى قالعان. پوليتسييا مالىمەتتەرىنە جۇگىنسەك، دۋتەرتو ەل باسقارعان العاشقى التى ايدا كەمىندە 2000 ادام پوليتسييا قولىنان قازا تاۋىپ، تاعى 4000 ادامدى بەلگىسىز بىرەۋلەر ولتىرىپ كەتكەن. «ولىم مۇندا تۋۋدان الدەقايدا كوپ بولىپ تۇر»، – دەيدى ديليمان فيليپپين ۋنيۆەرسيتەتىنىڭ انتروپولوگى نەستور كاسترو.

ويىنشىق ۇستاعان د. ۆالەنزۋەلا 28 جاسىندا كوز جۇمعان ا. رەدجانو مايىتىنىڭ قاسىندا. فيليپپيندە مارقۇمدى اقتىق ساپارعا شىعارىپ سالۋ الدىندا كۇزەتۋ داستۇرى بار. مايىت جالعىز قالماس ۇشىن ونىڭ قاسىندا ۇنەمى بىر كىسى بولۋى كەرەك.

شىعارىپ سالۋ راسىمىندە مايىت جالعىز قالدىرىلمايدى. قىلمىسكەردىڭ يمانىن تارازىلاۋ ۇشىن تابىت ۇستىنە جەم شاشىلىپ، بالاپاندار جىبەرىلەدى. مارقۇمنىڭ و دۇنيەگە «قاجەت بولاتىن» بارلىق جەكە زاتتارى قوبديشاعا سالىنادى. قوبديشا ۇيدەن شىعارىلعاننان كەيىن ۇش رەت اينالدىرىلىپ، جەرلەۋ ورنىنا جەتكەنگە دەيىن جولعا تيىن لاقتىرىلادى. «بۇل – اقتىق ساپار اقىسى»، – دەيدى بىلەتىندەر. وتباسى مۇشەلەرى «پارامدام» دەپ اتالاتىن راسىم كەزىندە مارقۇم ارۋاعىنىڭ شاڭىراققا كەلۋىن كۇتەدى. ونىڭ كورىنۋى اقىرعى حابار قىزمەتىن اتقارىپ، جۇبانىش ارقاۋىنا اينالادى. مارقۇمنىڭ ولىمى اياق استىنان نەمەسە بەيمالىم جاعدايدا بولسا، پارامدامنىڭ مانى ارتا تۇسەدى.

جانازاسىن شىعارۋ الدىنداعى تۇندە اپكەسىنىڭ تۇسىنە ەريكاردو كىرىپتى. «جىميىپ تۇردى»، – دەيدى ول. ەريكاردو اشۋلى بولماعاندىقتان «ونىڭ رۋحى كەك سۇراپ، بۇل دۇنيەدە قالىپ قويمايتىنى» اپكەسىنىڭ كوڭىلىن جۇباتتى. «بۇل وعان تان ەدى، – دەيدى دجوي، – سەبەبى ول اقكوڭىل بولاتىن».

دجوي سەكىلدىلەر ۇمىت ەتكەن ادىلەتتىلىك بۇل – وش الۋ. جالپى، كىسى ولتىرگەندەردىڭ بىرەن-سارانى عانا ۇستالادى.

ايەل ادام بارانگكا قالالىق زيراتىندا تەلەفونىن تەكسەرىپ وتىر (جوعارىدا). تىرىلەردى قورعاۋ ۇشىن مايىت جەرلەنبەي جاتىپ ارنايى راسىمدەر ورىندالادى. ۇلكەندەر قىز بالانى (تومەندە) تابىت ۇستىنەن اينالدىرىپ جاتىر. بۇل راسىم ارۋاقتار تىنىشتىعى ۇشىن جاسالادى. 31 جاستاعى حونگكو مەن قاسىنداعى بەس ادام اياۋسىز ولتىرىلگەن. حونگكونىڭ ارتىندا جارى مەن التى بالاسى قالدى.

بەس جاسار فرەنسيس مانوسكا تابىتىنىڭ ۇستىنە (جوعارىدا) ازا تۇتۋشىلار جەم شاشقان، بۇل ارەكەت قىلمىسكەرلەر «ارىن وياتۋ ۇشىن» دەگەنگە سايادى. وسى بالا مەن ونىڭ اكەسى – دومينگو مانوسكانى ۇيلەرىندە اتىپ كەتكەن. ولاردىڭ ارتىندا فرەنسيستىڭ توعىز جاسار اپكەسى، بىر جاستاعى قارىنداسى مەن دومينگونىڭ بوسانۋعا ساناۋلى كۇندەر عانا قالعان جارى قالدى.

       

پىكىر جازۋ