.

«جىلاعان اتا» ۇڭگىرىنىڭ قاسيەتى

قاراتاۋ باۋرايىنداعى ۇڭگىردىڭ «جىلاعان اتا» اتانىپ كەتۋىنە قاتىستى ەل ىشىندە اڭىز-اڭگىمەلەر جيى ايتىلادى.

سونىڭ بىرى بىلاي باياندالادى: «ەرتەرەكتە قارت قاراتاۋدا مەكەن ەتكەن گۇرزىحان دەگەن كىسى جالعىز پەرزەنتكە زار بولىپ، ار كۇنىن اللادان بالا سۇراۋمەن وتكىزەدى. سودان كۇندەردىڭ كۇنىندە اللا ونىڭ تىلەگىن قابىل ەتىپ، كەلىنشەگىنىڭ قۇرساعىنا بالا بىتەدى. كەلىنشەگىنىڭ اي-كۇنى جەتىپ بوسانعاندا دۇنيەگە ەل كۇتكەندەگىدەي بالا ەمەس، قارىن تارىزدى دوپ-دوڭگەلەك مەس كەلەدى. ونى كورىپ، اڭ-تاڭ بولعان ادامدار مولدا شاقىرتىپ، قۇپييانىڭ سىرىن اشىپ بەرۋىن وتىنەدى. مان-جايدى بىردەن تۇسىنگەن مولدا الگى كىسىگە بىلاي دەيدى: «بۇل تەگىن ەمەس. جۇبايىڭ مەستى ەتەگىنە وراپ الىپ، قىرىق بىر كۇن كوزىنىڭ قاراشىعىنداي ساقتاپ جۇرۋى كەرەك»، – دەپ كەتىپ قالادى. بىراق ونىڭ ايەلى شىدامسىز بولىپ شىعادى. قىرىق كۇنگە جەتپەي جاتىپ، ابدەن تاعاتى تاۋسىلعان ايەل كۇيەۋىنە قاراپ: «مەستى قاشانعا دەيىن كوتەرىپ جۇرە بەرەمىن» دەيدى دە ەتەگىن جازىپ كەپ جىبەرەدى. سودان دوپتاي دومالاعان الگى مەس سايدان سايعا سەكىرىپ بارىپ، ورتاسىنان قاق ايىرىلادى. ىشىنەن قولىندا اسا تاياعى بار كىشكەنتاي بالا ىتقىپ شىعىپ: «قىرقىنا شىداپ، قىرىق بىرىنە شىداماعانىڭ با؟» دەپ تاۋعا قاراي قاشا جونەلەدى. اتا-اناسى بالانىڭ ارتىنان قانشا جۇگىرسە دە قۋىپ جەتە الماپتى. سول كەزدە بالا بيىك تاۋعا شىعىپ الىپ، بەيتانىس بىر ۇڭىرگە بىرجولاتا ەنىپ كەتەدى. ال جالعىز پەرزەنتىنەن قول ۇزىپ قالعان اتا-اناسى ەگىلە جىلاپ قالا بەرىپتى».

قازىر ول جەرگە ادامدار زييارات ەتۋگە جيى كەلەدى. بۇنى جاي عانا اڭىز دەسەك تە، سول ۇڭگىردىڭ كىرە بەرىسىندە جالاڭ اياق بالانىڭ ىزدەرىن دە، «جىلاعان اتانىڭ كوز جاسىنا» بالانعان قۇز جارتاستان تامشىلاعان سۋدى دا كورۋگە بولادى.

جىلاعان اتا ۇڭگىرى – تۇركىستان قالاسىنان 80 شاقىرىم قاشىقتىقتا ورنالاسقان.

فوتو: دميتريي رۋگيس

       

پىكىر جازۋ