.

ارقانىڭ كەربەز سۇلۋ كوكشەتاۋى…

1 فوتو

قازاق دالاسىنداعى ەرەكشە سۇلۋ، مەيلىنشە كورىكتى مەكەندەرىنىڭ بىرى – كوكشەتاۋ. تابيعات جاراتىلىسىنىڭ وسىناۋ تاماشاسىنا تامسانعان اقىندار كوكشە وڭىرىن «كەربەز كوكشە» دەپ جىرلاسا، قىلقالام شەبەرلەرى ونداعى پەيزاج تۋدىراتىن قۇبىلىستى سالۋدان ەش جالىقپاعان. كوكشە وڭىرى جەر بەتىندە سيرەك كەزدەسەتىن، وزىنە عانا تان ەرەكشەلىكتەرى باسىم گەوگرافييالىق اۋماق رەتىندە كەڭىنەن تانىمال. انتروپولوگ ورازاق سماعۇلوۆتىڭ ايتۋىنشا، كەڭەس زامانىندا گەولوگتار كوكشەتاۋ وڭىرىن «ەڭ كونە جەر» دەپ انىقتاعان ەكەن.

5 فوتو

جەر شوقتىعى اتانعان كوكشەتاۋ تابيعاتىنىڭ اسەمدىگىمەن عانا ەمەس، اۋاسىنىڭ دا جانعا شيپا، دەرتكە داۋاسىمەن دە ايگىلى. اسىرەسە، بۋراباي شاتقالىنداعى شوقىسى بيىك بۇدىرلى تاۋلار، قىلقان جاپىراقتى نۋ ورمان – دەمالۋشىلارعا جايلىلىق سىيلاپ، ەمگە شيپا، دەمگە قۋات بەرەدى. بۋرابايدىڭ بالشىعى مەن مينەرالدى سۋى دا ەمدىك قاسيەتكە يە.

4 فوتو

بۋراباي قازاقستانداعى عانا ەمەس، تمد اۋماعىنداعى ەڭ تانىمال دەمالىس ورىندارىنىڭ بىرى. تەڭىز دەڭگەيىنەن 320،6 مەتر بيىكتىكتە ورنالاسقان بۋراباي كولى – ەمدىك قاسيەتىمەن دە، قايتالانباس كورىنىسكە تولى تابيعاتىمەن دە كوز تارتادى. كولدىڭ ورتاسىندا ورىن تەپكەن الىپ تاس ۇيىندىسى وسىناۋ مەكەننىڭ ەرەكشە سۇلۋلىعىن عانا ەمەس، اربىر كەلۋشىگە قۇپيياعا تولى سيۋجەتتىڭ سىرىن اشقىسى كەلەتىندەي.

قىراتتا، تەكتونيكالىق ويىستا، تابيعي تۇرعىدا پايدا بولعان كولدىڭ ۇزىندىعى 4،5 شاقىرىم، ەنى 3،9 شاقىرىم. ورتاشا تەرەڭدىگى 4،5 مەتر، ال ەڭ تەرەڭى – 7 مەترگە دەيىن بارادى. سۋى مولدىر، تۇششى، جۇمساق. ەشقايدا قوسىلمايتىن تۇيىق كولدە اقتورتا، الابۇعا، سازان، تابان، شورتان بالىقتارى وسەدى. سىڭسىعان سۇلۋ قاراعايلى-قايىڭدى ورمانى، كوكشە شوقىلارى، اڭىز بولعان جۇمباقتاس، اتاقتى ابىلايحان الاڭى، وقجەتپەس شىڭى – مۇنىڭ بارى تۋريستەر ۇشىن كەرەمەت اسەر قالدىراتىنى سوزسىز.

2 فوتو

سونىمەن قاتار، بىرىنە-بىرى جاقىن جاتقان كوكشەتاۋدىڭ سەكسەن كولىنىڭ بىر ۇزىكتى تىزبەگى – شورتاندى، ۇلكەن شاباقتى، كىشى شاباقتى، قوتىركول، جوكەي، بۋراباي – تۇتاستاي وسى وڭىرگە ەرەكشە سيپات بەرەدى. حالىقارالىق تۋريزم اگەنتتىكتەرىنىڭ مالىمەتىنە قاراعاندا، بۋراباي تمد اۋماعىندا ەڭ تانىمال كۋرورتتاردىڭ ىشىندە ىستىقكولدەن كەيىن ەكىنشى ورىندا تۇر.

3 فوتو

مالىمەتتەرگە سۇيەنسەك، بۋراباي دەمالىس ايماعى رەتىندە 1810 جىلدان مالىم بولا باستاعان. وندا 1910 جىلى قىمىزبەن ەمدەۋ – ساۋىقتىرۋ ورنى اشىلدى. 1920 جىلدان باستاپ مەملەكەتتىك ماڭىزى بار دەمالىس كەشەنىنە اينالعان. ەل استاناسى ارقاعا كوشىرىلگەلى «بۋراباي» شيپاجايىنىڭ، ونداعى دەمالىس ورىندارىنىڭ ماڭىزى بۇرىنعىدان دا ارتا تۇسكەن. جاقسى جول سالىنىپ، دەمالىس ورىندارى زامانعا ساي جاڭارىپ، قىزمەت كورسەتۋ ساپاسى دا جاقساردى.

فوتو: تۇرار قازانعاپوۆ، ەربولات شادراحوۆ.

0
       

پىكىر جازۋ

كىرۋ
*
*



تىركەلۋ
*
*
*
جاڭا قۇپييا سوز