.

سۇلۋلىعىن سۋرەتتەۋگە تىل جەتپەيتىن – مۇزتاۋ

مۇزتاۋ. ورالحان بوكەەۆ شىعارماسىنىڭ باستى تاقىرىبى بولعان وسى بىر شىڭ رەسپۋبليكامىزداعى التاي تاۋىنىڭ تورىنە ورنالاسقان. جالپى پوشىمى تۇيەنىڭ وركەشىندەي بولىپ جاتقان قوس شوقىنىڭ  شىعىس جاقتاعى بىر بولىگىنىڭ بيىكتىگى 4506 مەتر دە، باتىستاعى ەكىنشىسىنىكى 4435 مەتر. مۇزتاۋدى الەمدەگى بيىك تاۋلار كىرمەگەنىمەن ونىڭ قاۋىپتىلىگى باسقا شىڭداردان اسىپ تۇسپەسە، كەم ەمەس. سەبەبى، مۇنداعى سۇڭگىلەنگەن مۇز قاتپارلارىنىڭ كوپتىگى سونشالىق، جوعارىعا ورمەلەيتىن جەردىڭ ون بويى وڭشەڭ سىرەسكەن مۇزداقتاردان تۇرادى. اتالمىش تاۋ باسىنا اپاراتىن جالعىز عانا جول بار. ال قالعانىنىڭ بارلىعى الپينيستەرگە تىڭعىلىقتى دايىندىقتى تالاپ ەتەدى.

مۇزتاۋ!

ونىڭ اشىق بولاتىن كۇندەرى سيرەك. كوبىنەسە ول كيىزدەي ۇيىسقان جاباعى بۇلتپەن تۇمشالانىپ جاتادى. بۇل شىڭ ۇنسىزدىكتى، ولى تىنىشتىقتى بويىنا بۇقتىرىپ جاتقان جۇمباق نۇكتە. وسىعان قاراپ ونى مۇنداعى اۋا رايى عانا ەمەس، جەر جاعدايى دا ار سات سايىن وزگەرىپ تۇراتىن جاندى تابيعات قۇبىلىسى كەيپىندە كوزگە ەلەستەتكەندەي  بولاسىڭ. ونىڭ بەتكەيىندەگى كۇنىنە الدەنەشە رەت قايتالانىپ تۇراتىن تاس كوشكىنى مەن قار كوشكىنى بىز سوز ەتىپ وتىرعان شىڭنىڭ بۇلجىماس ەرەكشەلىكتەرىنىڭ بىرى.

مۇزتاۋ!

وزىنىڭ بولمىسىنا جۇمباقتىقتى، تىلسىمدىقتى، قۇپييا­لىقتى ۇستاپ تۇرعان وسى بىر نۇكتەگە الەمنىڭ تالاي ساياحاتشىلارى تاڭدانىس بىلدىرگەن. ماسەلەن، حح عاسىردىڭ باسىندا اتاقتى سۋرەتشى نيكولاي رەريح بىز سوز ەتىپ وتىرعان تاۋ تۋرالى: «ورتالىق ازييانىڭ كەڭ بايتاق كەڭىستىگىندەگى ۇلى دالا مەن اسقارالى التايدىڭ شىرقاۋ شىڭى – مۇزتاۋ. عارىشتان قۇدىرەتتى قۋات الاتىن جەر بۇل. مىناۋ عالامداعى بارلىق اۋليەلەردىڭ ارۋاقتارى باس قوساتىن، كيەلى شامبالانىڭ قاسيەتتى دە ارداقتى ەلى ول»،– دەسە، ودان كەيىن مۇندا  ات باسىن بۇرعان اعىلشىن الپينيسى ساميۋەل تەرنەر بىلاي دەيدى. «قارسى الدىمنان سۇلۋلىعىن سۋرەتتەۋگە تىل جەتپەيتىن تابيعاتتىڭ تاماشا كورىنىسى اشىلدى. سوعان قاراپ تۇرىپ، بۇل تاۋ تۋرالى الى كوپ سوز زەرگەرلەرىنىڭ قالام تارتپاعانى، كوركەمدىكتىڭ وسى كەلبەتىن فوتوكامەرانىڭ جون-جوسىقسىز قورلاي قويماعاندىعى جانە مۇنداي مۇمكىندىكتى كورۋدىڭ ادام ومىرىندە بىر-اق كەزدەسەتىنى تۋرالى سانامداعى ويدىڭ  جىلت ەتۋى مۇڭ ەكەن، جولشىباي باستان وتكەرگەن قيىندىقتاردىڭ بارى ۇمىتىلىپ سالا بەردى».

يا، بۇل تاۋ قاسيەتتى. كيەلى ورىن. عىلىمي پايىمداۋلارعا قاراعاندا، عارىش ساۋلەلەرى مۇندا سىنباي، شاشىراماي، ەش وزگەرىسسىز تازا كۇيىندە كەلىپ جەتەدى. كوكتەن كەلگەن قۋاتتار وسى تاۋ شىڭىنا وزىنىڭ تولىققاندى كۇيىندە كەلىپ جەتىپ، جەر بەتىنە تارالادى. جەر مەن عارىش اراسىنداعى كوزگە كورىنبەس بايلانىس دەگەنىمىز وسى شىعار، سىرا.

اۆتورى – جانبولات اۋپباەۆ، فوتو: ەربولات شادراحوۆ

0

Publication author

offline 2 ساع

ايبەك

0
Comments: 2Publics: 708Registration: 01-10-2016
       

پىكىر جازۋ

كىرۋ
*
*
تىركەلۋ
*
*
*
*
Password generation